Neft bazarında nə kimi yeniliklər gözlənilir?

01.07.2019 Energetika
İyulun 1-2-də Vyanada neft bazarında yaxın gələcəklə bağlı mühüm qərarların qəbul olunması gözlənilir.
OPEC-ə üzv və bəzi qeyri-OPEC ölkələri hasilatın həcminin azaldılması ilə bağlı sazişin müddətini növbəti 6-9 ayadək uzada bilər. Ekspertlərin fikrincə, OPEC və kartelə üzv olmayan ölkələrin bu addımı ilə dünya bazarında neftin qiymətinə sabitləşdirici təsir göstəriləcəyi qənaətindədirlər. Hamburq Kommersiya Bankının baş iqtisadi analitiki Sayrus de la Rubia görüşləri şərh edərkən bildirib ki, bütün gedişat hasilat həcminin qüvvədə saxlanacağına dəlalət edir. Lakin bir sıra dövlətlərin nə dərəcədə intizamlı olacağı və uzunmüddətli perspektivdə öhdəliklərə hansı səviyyədə əməl edəcəyi böyük sual doğurur. Ötən ilin dekabrında 14 dövləti öz ətrafında birləşdirən OPEC və bu təkilata üzv olmayan 10 ölkə gündəlik hasilatın 1,2 milyon barrel azaldılması barədə razılıq əldə etmişdilər. Hazırda qlobal neft hasilatının yarısı "OPEC plus" ölkələrinin payına düşür və istehsal həcminin aşağı həddə saxlanması hasilatçı ölkələr üçün iqtisadi çətinliklər yaradır. Məhz bu səbəbdən də ötən iclasda istehsal həcminin azaldılmasına dair qərar İran və Venesuelaya şamil edilməmişdi. Beynəlxalq Enerji Agentliyinin (IEA) məlumatına görə, hasilatın həcminin azaldılmasına dair qərar "OPEC plus" ölkələri tərəfindən tam icra edilib, bəzi ölkələr isə istehsalı nəzərdə tutulandan da aşağı salıblar. S.Rubia, həmçinin qeyd edib: "Hazırda ABŞ və Çin arasında ticari münaqişə, ABŞ və İran arasında Fars körfəzindəki gərginlik və eləcə də Venesueladakı siyasi proseslər "OPEC plus" qərarının dünya neft bazarına nə qədər ciddi təsir edəcəyini də sual altına qoyur. Bununla belə, dünyadakı müsbət iqtisadi inkişaf əsas ümidverici faktor olaraq qalır. Əgər konyunktura proqnozları müsbət olaraq qalsa, bu da öz növbəsində "OPEC plus" qərarının effektivliyinə öz təsirini göstərəcək". Qeyd edək ki, iyulun 1-2-də Vyanada OPEC Nazirlər Şurasının 176-cı iclası, eləcə də OPEC-ə üzv və qeyri-üzv dövlətlərin nazirlərinin 6-cı görüşü keçiriləcək. Həmçinin "OPEC plus" Nazirlərinin Birgə Monitorinq Komitəsinin 15-ci iclası təşkil ediləcək. Görüşlərdə hasilat azaldılmasına dair sazişin müddətinin daha 6-9 ay uzadılmaqla ötən ilin dekabrında qəbul edilmiş səviyyədə saxlanılması əsas müzakirə mövzusu olacaq.
  • Əvvəlki

    Azərbaycan bankları aktivləri azalan ölkələr siyahısında ilk onluqdadır

Digər xəbərlər

VTB