"Bakı-Pivə"nin xalis mənfəəti cüzi artıb

30.06.2018 Sənaye
"Bakı-Pivə" ASC 2017-ci ili 399 min 946 manat xalis mənfəətlə başa vurub. Müqayisə üçün qeyd edək ki, ASC 2016-cı ili 311 min 526 manat xalis mənfəət ilə bağlamışdı.

"Kommersant" ASC-nin maliyyə hesabatına istinadən xəbər verir ki, 2016-c ildə 488 min 538 manat olmuş əsas əməliyyat gəliri 2017-ci ildə 488 min 746 manat təşkil edib. Sair əməliyat gəliri və 2016-cı il üzrə düzəliş hesabına şirkətin ümumi əməliyyat gəliri 631 min 745 manata yüksəlib. Əməliyyat xərcləri çıxıldıqdan sonra ASC-nin 499 min 933 manat mənfəəti yaranıb. Mənfəətdən 99 min 987 manat mənfəət vergisi ödənilib.

31 Dekabr 2017-ci il tarixində "Bakı-Pivə" ASC 2 milyon 391 min manat cəmi aktivlərə, 1 milyon 717 min manat cəmi kapitala və 674 min 149 manat cəmi öhdəliklərə malik olub.

"Bakı-Pivə" ASC 2016-cı ilin sonunda 2 milyon 139 min manat cəmi öhdəliklərə, 1 milyon 745 min manat cəmi kapitala və 394 min manat cəmi öhdəliklərə malik idi. ASC-nin aktivlərinin artmasının səbəbi debitor borcların 1 milyon 709 min manatdan 1 milyon 960 min manata qalxmasıdır. "Bakı-Pivə"nin qısamüddətli öhdəlikləri də artıb.

Keçmiş Xırdalan Pivə Zavodu olan "Bakı-Pivə" ASC-nin əmlakı "Carlsberg Azerbaijan" MMC-nin ( əvvəlki "Baltika Bakı" MMC) icarəsindədir. "Carlsberg Azerbaijan" şirkəti mənzil-qərargahı Danimarkanın paytaxtı Kopenhagen şəhərində yerləşən “Carlsberg Group”a məxsusdur. "Bakı Pivə" ASC-nin də səhm nəzarət paketi “Carlsberg Group” şirkətinə məxsusdur. Pivə istehsalı və satışı ilə "Carlsberg Azerbaijan" şirkəti məşğul olur. Bu səbəbdən gəlirin böyük hissəsi bu şirkət tərəfindən götürülür.