Azərbaycanda fəaliyyət göstərən 30 bankdan 5-nin məcmu kapitalı bank qanunvericiliyində nəzərdə tutulan tələbdən – 50 milyon manatdan az olduğuna görə, “Qırmızı Zona”ya daxil olub.
“Kommersant.az” bankların 2018-ci il iyun ayının 1-nə olan rəsmi hesabatlarına əsaslanaraq xəbər verir ki, bağlanma riski daşıyan və hazırda qırmızı zonada olan banklar “AG Bank”, “Access Bank”, “AmrahBank”, “Bank of Baku” və “Pakistan Milli Bankı”nın Bakı filialıdır.
Ən az kapital göstəricisi Pakistan bankında olsa da, Azərbaycan və Pakistan hökumətləri arasındakı razılaşmaya görə bu bankın kapitalı tədricən artırılacaq. Yəni, banklara olan ənənəvi kapital tələbi və onun mümkün nəticələri Pakistan Milli Bankının Bakı filialına aid deyil.
Bundan sonra ən aşağı məcmu kapital göstəricisi “Bank of Baku”dadır – 24,3 milyon manat. Xatırladaq ki, maliyyə problemi yaşadığı üçün dekabr ayında lisenziyası ləğv edilən “DəmirBank”ın məcmu kapitalı 25,5 milyon manat idi. Hazırki vəziyyətdə isə “Bank of Baku”nun məcmu kapitalı “Dəmir Bank”ın məcmu kapitalından da aşağıdır (1,2 milyon manat). Yəni, lisenziyası ləğv ediləcək bankların siyahısında “Bank of Baku” birinci sıradadır.
Digər bankların da vəziyyəti ürəkaçan deyil. Bu banklar fəaliyyətlərini davam etdirmək üçün ya kapitallarını artırmalı, ya da konsolidasiyaya getməli, yəni başqa bankla birləşməlidirlər.