31.08.2025 Siyasət

0 0

Bu gün Danimarkanın paytaxtı Kopenhagendə AB xarici işlər nazirləri ilə görüşdən əvvəl danışan AB Xarici Siyasət Ali Nümayəndəsi Kaja Kallas, İsrailə qarşı sanksiyalar mövzusunda "bölünmüş" olduqlarını ifadə edərək, "Bu mövzuda vahid səsimiz olmasa, qlobal səhnədə səsimiz yoxdur. Bu, tamamilə problemlidir" dedi.

Bir çox AB hökumətləri İsrailin müharibə ilə bağlı mövqeyini, xüsusən də mülki əhalinin ölümü və humanitar yardıma qoyulan məhdudiyyətlərə görə tənqid edib. Bununla belə, Aİ səviyyəsində effektiv siyasi və iqtisadi addımlar barədə razılıq əldə olunmayıb.

İrlandiya, İspaniya, İsveç və Hollandiya kimi ölkələr İsraillə azad ticarət sazişinin dayandırılmasını tələb ediblər. Lakin İsrailin Almaniya, Macarıstan və Çexiya kimi ənənəvi müttəfiqləri bu addımlara qarşı çıxıblar. İrlandiyanın xarici işlər naziri Simon Harris Kopenhagendəki görüşdən əvvəl "Aİ indi kollektiv addım atıb İsrailə qarşı sanksiyalar tətbiq etməsə, nə vaxt olacaq? Daha nə lazımdır? Uşaqlar acından ölür" söyləyib.

İclasa ev sahibliyi edən Danimarka xarici işlər naziri Lars Lokke Rasmussen ölkəsinin İsrail nazirlərinə qarşı sanksiyalar tətbiq etməyə və Aİ-nin İsraillə Assosiasiya Sazişinin ticarət komponentini dayandırmağa hazır olduğunu bildirib. Rasmussen, "Ən dağıdıcı humanitar fəlakətin şahidi oluruq. İsrail kursunu dəyişməlidir" bildirib.

Aİ İsrailin ən böyük ticarət tərəfdaşıdır. Aİ-nin məlumatına görə, ötən il iki ölkə arasında ticarət dövriyyəsi 42,6 milyard avroya çatıb.