07.08.2023 Sərfəli Banklar

84 14

Kommersant.az bankın maliyyə hesabatına istinadən xəbər verir ki, “AccessBank”ın aktivlər cəmi 2023-ci ilin 6 ayına 148 milyon 450 min manat və ya 12.7 faiz artaraq 1 milyard 317 milyon 305 min manata yüksəlib. Bu artımda kredit portfelinin payı 84.7 faiz olub. Bankın meştərilərinə verdiyi kreditlər 125 milyon 718 min manat və ya 15.4 faiz artaraq 939 milyon 267 min manata çatıb.

İstehalk kreditlərinin həcmi 49 milyon 11 min manat artaraq 223 milyon 226 min manata, biznes kreditləri isə 76 milyon 776 min manat artaraq 710 milyon 793 min manata bərabərləşib. “AccessBank”ın daşınmaz əmlaka verdiyi kreditlər keçən ilin sonu ilə müqayisədə 69 min manat azalaraq 5 milyon 248 min manat olub.

Mümkün zərərlər üçün yaradılan məqsədli ehtiyatını 3 milyon 725 min manat artıraraq 37 milyon 705 min manat etdiyi üçün “AccessBank”ın xalis kreditləri 901 milyon 562 min manat olub. Bu da ötən ilin sonu ilə müqayisədə 121 milyon 993 min manat və ya 15.6 faiz çoxdur.

“AccessBank”ın müştərilərindən topladığı depozitlərin həcminin artması bankın öhdəliklər cəminin artmasına səbəb olub. Belə ki, “AccessBank” fiziki şəxslərdən aldığı əmanətlərin həcmini 77 milyon 613 min manat artaraq 796 milyon 626 min manata çatıb. Biznesmenlərin əmanətləri isə 47 milyon 915 min manat artaraq 188 milyon 956 min manata yüksəlib. Nəticədə bankın depozit portfeli 985 milyon 582 min manat olub ki, bu da ötən ilin sonu ilə müqayisədə 125 milyon 528 min manat və ya 14.6 faiz çoxdur.

Buna görə də bankın öhdəliklər cəmi 127 milyon 768 min manat və ya 12 faiz artaraq 1 milyard 183 milyon 861 min manat olub.

Səhmdar kapitalını dəyişdirməyən “AccessBank”ın ümumi ehtiyatları 1 milyon 213 min manat artaraq 9 milyon 90 min manata bərabərləşib. Bankın yığılmış zərəri isə 19 milyon 469 min manat azalaraq 145 milyon 753 min manat olduğuna görə bankın kapital cəmi də ertıb. Belə ki, cəmi kapitalı 20 milyon 682 min manat və ya 18.3 faiz artaraq 133 milyon 444 min manat olub.

“AccessBank”ın faiz gəliri ötən ilin eyni rübü ilə müqayisədə 26 milyon 235 min manat və ya 40.9 faiz artaraq 90 milyon 290 min manata, faiz xərcləri isə 7 milyon 494 min manat artaraq 34 milyon 363 min manata çatıb. Buna görə də bank 55 milyon 927 min manat xalis faiz gəliri əldə edib ki, bu da ötən ilin 2-ci rübü ilə müqayisədə 18 milyon 741 min manat və ya 50.4 faiz çoxdur.

Qeyri-faiz gəlirini 3 milyon 746 min manat artaraq 8 milyon 363 min manata, qeyri-faiz xərcləri isə 5 milyon 24 min manat artıran “AccessBank” yükunda əməliyyat mənfəəti əldə edib. Bankın sözügedən mənfəəti ötən ilin analoji dövrü ilə müqayisədə 17 milyon 463 min manat artaraq 24 milyon 418 min manat olub. Bu mənfəətdən 4 milyon 949 min manatı mümkün zərərlər üçün məqsədli ehtiyata ayrıldığı üçün “AccessBank”ın xalis mənfəəti 19 milyon 469 min manat olub. Bu da ötən ilin müvafiq dövrü ilə müqayisədə 17 milyon 629 min manat çoxdur.

Qeyd edək ki, əldə olunan xalis mənfəətdən vergi xərcləri çıxılmayıb.

“AccessBank”ın aktivlərinin gəlirliyi 1.32 faiz artaraq 1.47 faizə, kapitalının gəlirliyi isə 12.97 faiz artaraq 14.6 faizə yüksəlib.