Nazirliyin əməkdaşına 100 manata görə cinayət işi açıldı

6 Noyabr 19:24 Hadisə
Azərbaycan Respublikası Vergilər Nazirliyinin 6 saylı Ərazi Vergilər İdarəsinin əməkdaşı Həsənov Vidadi Adil oğlu barəsində cinayət işi açılıb.

"Kommersant.az"ın Oxu.aza istinadla xəbərinə görə, cinayət işinin başlanmasına səbəb V.Həsənovun vətəndaşdan əsassız olaraq 100 manat pul tələb etməsi barədə Vergilər Nazirliyinin Çağrı Mərkəzinə ünvanlanmış müraciət əsasında toplanmış materiallar olub.

Buna görə V.Həsənov haqqında Cinayət Məcəlləsinin 309.1-ci (Vəzifəli şəxs tərəfindən xidməti səlahiyyətlərinin hüdudlarından açıq-aşkar surətdə kənara çıxan hərəkətlər etməsi fiziki və ya hüquqi şəxslərin hüquqlarına və qanuni mənafelərinə, yaxud cəmiyyət və ya dövlətin qanunla qorunan mənafelərinə mühüm zərər vurduqda) maddəsi ilə cinayət işi açılıb.