Deputat Araz Əlizadəni təhqir edənlərə səsləndi: “Ölü adam indi bu sualları cavablaya bilərmi?”

“Azərbaycan Sosial Demokrat Partiyasının mərhum sədri Araz Əlizadə qardaşı Zərdüşt Əlizadə ilə birgə Azərbaycan Xalq Cəbhəsi yarananda onun fəal üzvlərindən biri olmuşdu. Sonradan onlar müəyyən təzadlı fikirlərə görə Xalq Cəbhəsinin platformasına qarşı çıxdılar, ikisi də Xalq Cəbhəsini tərk edib, yeni partiya yaratdılar. İndiyə kimi də həmin partiyanı idarə edirdilər. Araz Əlizadənin müəyyən fikirlərini obyektiv qəbul etmək olar. Çünki o, bəzi hallarda Azərbaycanın milli maraqlarından çıxış edib. Lakin onun təzadlı, Azərbaycan həqiqətlərini əks etdirməyən, emosional fikirləri də olub. Araz Əlizadə siyasi partiya rəhbəri idi. O, Azərbaycan cəmiyyətində siyasətçi kimi müəyyən dairələr tərəfindən qəbul olunub. Araz Əlizadə dünyasını dəyişibsə, onun haqqında mənfi fikirlər söyləmək, alçaldıcı sözlər demək insanlığa, azərbaycanlılığa uyğun deyil”.

Bu sözləri Pravda.az-a açıqlamasında Milli Məclisin deputatı Tahir Rzayev deyib.

Deputat bildirib ki, indi səsləndirilən sözləri sağlığında Araz Əlizadənin üzünə demək olardı:

“Sağ idi, yeri gəlsə, indi tənqid edənlərin suallarına özü cavab verərdi ki, kimə xidmət edib, kimlə əlaqəli olub, hansı sahədə nöqsanlara yol verib və s. Ölü adam indi bu sualları cavablaya bilərmi? Əlbəttə, yox. Ona görə də belə hallara çox mənfi baxıram. İnsan dünyasını dəyişdi, haqq dünyasına qovuşdusa, onun adını bu cür hallandırmamalıdırlar. Kiçik nöqsanı böyüdüb, onun üzünə vurmaq olmaz. Müəyyən zaman sonra siyasi partiyaların liderləri, ölkədə o dövrün siyasi vəziyyəti, müəyyən məsələlər təhlil olunur. Doğrudan da, dövlət, dövlətçilik haqqında ciddi səhvləri varsa, təhlil etmək olar. Təhqir etmək, alçaldıcı sözlər demək, məncə, yaraşmır. Bu, düzgün yol deyil. Bunu mənfi hal kimi dəyərləndirirəm. Azərbaycanlıların çox yaxşı bir xüsusiyyəti var, “ölünün arxasınca danışmaq olmaz”. Əsl insan sağlığında Araz Əlizadəyə cavabını verərdi, nöqsanlarını üzünə deyərdi, onu düz yola qaytarardı, səhvləri nədirsə, müəyyən qaydada izah edərdi, bunu cəmiyyət də görərdi”.

milli məclis millət vəkili deputat