15.02.2023 Bank

16 4

Kommersant.az bankın balans hesabatına istinadən xəbər verir ki, “ExpressBank”ın cəmi aktivləri 1 il ərzində 85 milyon 588 min manat və ya 24.3% artaraq 436 milyon 956 min manata yüksəlib. Bu artımın 41.6%-i kredit portfelinin payına düşüb. Belə ki, sözügedən portfel 2021-ci ili son rübü ilə müqayisədə 35 milyon 645 min manat və ya 13.6% artaraq 297 milyon 84 min manata bərabərləşib. Hər il olduğu kimi 2022-ci ildə də portfelin əsasını artıran kredit istehlak krediti olub. Bankın istehlak kreditləri 159 milyon 369 min manat olub ki, bu da 2021-ci ilin son rübü ilə müqayisədə 21 milyon 382 min manat və ya 15.5% çoxdur. Biznes kreditləri isə 6 milyon 330 min manat və ya 0.7% artaraq 95 milyon 845 min manata bərabərləşib. Bankın hesabatına görə il sonunda daşınmaz əmlaka verilən kreditlər 7 milyon 933 min manat və ya 23.4% artaraq 41 milyon 870 min manata bərabər olub.

“ExpressBank” mümkün zərərlər üçün yaradılan məqsədli ehtiyatını 5 milyon 427 min manat azaldaraq 5 milyon 456 min manata endirib. Nəticədə bankın xalis kreditləri 291 milyon 628 min manat təşkil edib. Bu da 2021-ci ilin analoji dövrü ilə müqayisədə 41 milyon 72 min manat və ya 16.4% çoxdur.

Qeyd edək ki, “ExpressBank”ın 2022-ci ilin sonunda əldə etdiyi xalis mənfəəti 12 milyon 408 min manata bərabər olub. Bu da 2021-ci ilin sonu ilə müqayisədə 4 milyon 707 min manat və ya 61.1% çoxdur. Buna görə də bankın əlində olan aktivlərin faiz gəlirliyi (ROA) 2.84% olub. Bu faiz isə 2021-ci ilin sonu ilə müqayisədə 0.65% çoxdur.