Azərbaycanda soğanın kilosu 5 qəpiyə düşdü

Azərbaycanda soğanın kilosu 5 qəpiyə düşdü - SƏBƏB

Bölgələrdə soğanın satış qiymətində kəskin ucuzlaşma başlayıb. Bazarlarda məhsulun kiloqramının 5-10 qəpiyə təklif olunması həm alıcılar, həm də təsərrüfat sahibləri tərəfindən geniş müzakirə edilir. Bu vəziyyət bazara böyük həcmdə yeni məhsulun çıxarılması və təklifin tələbi üstələməsi ilə bağlıdır.

Fermerlər məhsulu saxlamaq üçün anbar infrastrukturunun kifayət qədər olmadığını bildirirlər. Bu səbəbdən yığılan soğan qısa müddətdə satışa çıxarılır ki, nəticədə qiymətlər minimum həddə enir. Eyni zamanda ixrac imkanlarının zəifləməsi məhsulun daxili bazarda toplanmasına yol açır.

Məsələ ilə bağlı iqtisadçı ekspert Asif İbrahimov Demokrat.az-a bildirib ki, bölgələrdəki kəskin ucuzlaşma Bakı bazarlarında eyni dərəcədə hiss olunmur.

Onun sözlərinə görə paytaxtda qiymətlərin formalaşmasına nəqliyyat xərcləri və vasitəçilərin ticarət marjaları birbaşa təsir edir. Bu amillər Bakıda soğanın 5 qəpiyə satılmasını qeyri-mümkün edir.

“Yeni məhsulun yığılması ilə əlaqədar olaraq fermerlər məhsulu qısa müddətdə realizə etməyə çalışır. Saxlama imkanlarının məhdud olması da bu prosesi sürətləndirir və nəticədə qiymətlər aşağı düşür. Bəzi hallarda ixrac imkanlarının zəifləməsi məhsulun daxili bazarda qalmasına və qiymətlərin enməsinə təsir göstərir. Bölgələrdə müşahidə olunan bu aşağı qiymətlər paytaxt bazarlarına eyni səviyyədə təsir etmir. Bakı şəhərində nəqliyyat xərcləri, vasitəçi marjaları və ticarət xərcləri qiymətin daha yüksək formalaşmasına səbəb olur. Bu səbəbdən paytaxtda soğanın qiymətinin 5-10 qəpik səviyyəsinə düşməsi həqiqəti əks etdirmir. Mövcud vəziyyət göstərir ki, bu ucuzlaşma daha çox qısamüddətli və mövsümi xarakter daşıyır. Yaxın dövrdə bazarda təklif və tələbin balanslaşması ilə qiymətlərin daha stabil səviyyədə formalaşacağını düşünürəm”.