BMT: Ukraynada ən azı 10 min dinc sakin həlak olub

Birləşmiş Millətlər Təşkilatının (BMT) İnsan Haqları üzrə Ali Komissarı Volker Türk, Rusiya ilə müharibənin davam etdiyi Ukraynada ən az 10 min mülki şəxsin öldüyünü, 18 min 500 nəfərin isə yaralandığını bildirib.

BMT-nin İnsan Haqları üzrə Ali Komissarı Volker Türk BMT İnsan Haqları Şurasının təşkil etdiyi toplantıda Ukraynadakı insan haqlarının vəziyyəti ilə bağlı komissiyanın hesabatının nəticələri ilə bağlı qiymətləndirmələr edib.

2022-ci ilin fevralında Rusiya ilə başlayan müharibə səbəbiylə Ukraynadakı ağrılı vəziyyətin davam etdiyinə diqqət çəkən Türk, uzun illər davam edən müharibənin gələcək nəsillərin həyatına və insan haqlarına təsir edəcəyindən narahat olduğunu bildirib.

Türk, BMT-nin Ukraynadakı İnsan Haqları Monitorinq Missiyası (HRMMU) vasitəsilə hərtərəfli monitorinq və sənədləşdirmə aparmağa davam etdiklərini ifadə edərək, bu sənədlərin beynəlxalq insan haqları hüququnun və beynəlxalq humanitar hüququn ciddi şəkildə pozulmasını və xüsusilə Rusiya tərəfindən hərbi cinayətləri göstərməyə davam etdiyini vurğulayıb.

“142 məhkəməsiz edam var”

“Bu sənədlərə 2022-ci ilin fevralından bəri Rusiya silahlı qüvvələrinin nəzarətində olan və ya işğal etdiyi ərazilərdə mülki şəxslərin məhkəməsiz edam edilməsi ilə bağlı 142 iş daxildir”. Türk, məhbuslara qarşı geniş yayılmış işgəncə, pis rəftar və cinsi zorakılıq da daxil olmaqla bir çox zorla yoxa çıxma hallarını da sənədləşdirdiklərini diqqətə çatdırıb.