Google 700 milyon dollar ödəməyə razılaşdı

Amerika texnologiya nəhəngi Google, Android proqram mağazası Google Play Store ilə rəqabəti boğmaq ittihamı ilə ona qarşı açılan antiinhisar iddiasında 700 milyon dollar ödəməyə razılaşıb.

San-Fransisko federal məhkəməsindən açıqlanan məhkəmə sənədlərində Google-un istehlakçılara 630 milyon dollar, ABŞ ştatlarına isə 70 milyon dollar ödəməyə razı olduğu bildirilib. Bundan əlavə, Google yaxın 5 il ərzində müştərilərinə Play Store-dan başqa platformalardan Android cihazlarına proqramlar yükləməyə icazə verəcək.

Google-a qarşı açılan antiinhisar iddiasında o, tətbiqlərə qeyri-qanuni məhdudiyyətlər qoyaraq müştərilərinə əlavə ödənişlər tətbiq etməkdə günahlandırılıb. Google həmçinin tətbiqdaxili satınalmalarda 15-30 faiz komissiya alır. ABŞ-da yerləşən video oyun istehsalı və inkişaf etdirmə şirkəti olan Epic Games, dekabrın 11-də tətbiqdaxili ödənişlərə görə Google-a qarşı qaldırdığı antiinhisar işini qazandı.