Bank sektorunun son vəziyyəti - PALATANIN RƏSMİ HESABATI

25.07.2018 Bank
30 iyun 2018-ci il tarixinə Azərbaycanda fəaliyyət göstərən bankların cəmi aktivləri 27 milyard 991 milyon manat, kredit potfeli 11 milyard 712 milyon manat, cəmi öhdəlikləri isə 24 milyard 87 milyon manat təşkil edib. Sektorun balans kapitalı 3 milyard 904 milyon manat, əhalinin əmanətləri isə 8 milyard 19 milyon. manat olub. 2018-ci ilin ilk yarımilliyində bank sektorunun aktivləri 0.2% (70 milyon manat), balans kapitalı isə 5.2% (195 milyon manat) artıb.

"Kommersant.az" Maliyyə Bazarlarına Nəzarət Palatasının açıqladığı icmala əsasən xəbər verir ki, bank sektorunda maliyyə vasitəçiliyinin artması müşahidə olunur. Belə ki, cari ilin ilk yarımilliyində kredit portfeli 3.3% və ya 375 milyon manat (iyun ayı üzrə 1.4%, 160 milyon. manat), fiziki şəxslərin cəmi depozitləri 6.3% və ya 477 milyon manat (iyun ayı üzrə 2.9%, 227 milyon manat) artıb. Daha sabit maliyyələşmə mənbəyi hesab olunan əhalinin müddətli əmanətləri hesabat dövrü ərzində 9.7% və ya 505 milyon manat (iyun ayı üzrə 2.7%, 148 milyon manat) artıb.

Bank sektoru cari ilin ilk yarımilliyində 309 milyon manat əməliyyat mənfəəti generasiya edib. Bundan aktivlər üzrə mümkün zərərlərin ödənilməsi üçün xüsusi ehtiyata ayırmalar 258 milyon manat təşkil edib. Nəticədə, sektor cari ilin 6 ayında 36 milyon manat xalis mənfəət əldə edib.

Fəaliyyət göstərən 30 bankın filiallarının sayı 511, şöbələrinin sayı 143, ATM-lərin sayı 2481 olub. Bütövlükdə, bank sektorunun işçi heyəti cari ilin 6 ayı ərzində 3.5% və ya 566 nəfər (iyun ayı üzrə 0.5%, 75 nəfər) artaraq 16 737 nəfər təşkil edib.

30 iyun 2018-ci il tarixinə bank sektorunun əsas göstəriciləri bank sektorunun icmal göstəricilərində öz əksini tapıb.

Media orqanları əlavə məlumat almaq üçün www.fimsa.az[email protected] ünvanına müraciət edə bilərlər.