BTQ-yə maraq niyə artır?

(COVID-19) pandemiyası dövründə Bakı-Tbilisi-Qars (BTQ) dəmir yolu xətti ilə yük daşımalarına marağın artdığı hiss olunur. Bu baxımdan Türkiyədən daşımalar xüsusilə qeyd olunmalıdır.

Məsələn, bu il aprelin 18-də qonşu ölkənin istehsal etdiyi məhsulları daşıyan 940 metr uzunluğunda, 82 konteynerdən ibarət yük qatarı tərəfdaş ölkələrə doğru yola düşüb. Mayın 4-də isə Türkiyədən Gürcüstana rekord uzunluğa (1 050 metr) malik qatar yola salınıb. Qatar 100 konteynerdən ibarət olub. İyunun 18-də isə "Azərbaycan Dəmir Yolları" QSC-nin törəmə şirkəti olan "ADY Express" MMC BTQ ilə yeni növ yüklərin nəqlinə başlayıb.

İqtisadçı-ekspert Rəşəd Həsənov dəmir yolu xəttinə marağın artmasını təbii sayır, amma o, hesab edir ki, layihəni daha da rəqabətqabiliyyətli etmək lazımdır: "BTQ-nin potensialının artırılması istiqamətində müxtəlif layihələr həyata keçirilir. Artıq Qazaxıstan və Türkmənistan limanlarından Bakının Qaradağ rayonunun Ələt qəsəbəsindəki Yeni Bakı limanına yükdaşıma ilə bağlı biznes subyektləri arasında sazişlər var. Bununla belə, dəmir yolu xəttinin rəqabətqabiliyyətliliyinin daha da artırılması istiqamətində əlavə addımların atılmasına ehtiyac var".
Onun fikrincə, BTQ-nin Azərbaycan hissəsində qatarların sürətini artırmaqla və daşıma tariflərinə yenidən baxmaqla dəmir yolu xəttini daha cəlbedici etmək olar: "Nəzərə almaq lazımdır ki, yük daşımaları üçün ənənəvi marşrutlar var, bu istiqamətdə yanaşmaları dəyişmək üçün müəyyən qədər vaxt və daha peşəkar təqdimat lazımdır. Həmçinin daşımaların sürətinin artırılmasına, tariflərə yenidən baxılmasına ehtiyac var. Ümumiyyətlə, pandemiyanın geniş yayılması daha ehtiyatlı daşıma vasitələrindən istifadə üçün çağırış formalaşdırıb".

Xatırladaq ki, BTQ 30 oktyabr 2017-ci ildə açılıb. Dəmir yolu xətti Asiya və Avropanın dəmir yol şəbəkələrinin birləşdirilməsini təmin edir. Bu təkcə 3 ölkə arasında deyil, həm də Asiya ilə Avropa arasında ən qısa yoldur.