Gürcüstandakı birinci kompressor stansiyası əməliyyatlara hazırdır.

BP: Gürcüstandakı obyektlər “Şahdəniz-2” üzrə ilk təbii qazı göndərməyə hazırdır

Bu barədə BP şirkəti məlumat yayıb. Bildirilir ki, Gürcüstandakı birinci kompressor stansiyası (Sahə 81) tam əməliyyatlara hazırdır: "BP-nin Cənubi Qafqaz Boru Kəmərinin Genişləndirilməsi (CQBKG) layihəsinin Gürcüstandakı obyektləri 2018-ci ildə "Şahdəniz-2" üzrə ilk kommersiya qaz həcmlərini göndərməyə hazırdır".

Qeyd edək ki, Xəzər dənizinin Azərbaycan sektorundakı "Şahdəniz-2" yatağından hasil ediləcək qazı Avropaya daşıyacaq 3 min 500 kilometr uzunluğundakı Cənub Qaz Dəhlizinin Gürcüstan və Türkiyəyədək olan hissəsi bu il istismara veriləcək. Buraya genişləndirilən Cənubi Qafqaz Boru Kəməri, "Şahdəniz-2"dən hasil olunacaq ilk qaz həcmləri və Trans-Anadolu qaz boru kəmərinin (TANAP) istifadəyə verilməsi daxildir. "Şahdəniz" konsorsiumu ilk qaz satışını cari ildə Türkiyə və Gürcüstana həyata keçirəcək.

Azərbaycan təbii qazını Türkiyəyə və oradan da Avropaya nəql edəcək 1850 kilometr uzunluğundakı TANAP boru kəməri iyunun 12-də istismara veriləcək. İlkin mərhələdə TANAP-la Türkiyəyə ildə 2 milyard kubmetr qaz veriləcək. Daha sonrakı 3 il ərzində bu həcm 6 milyard kubmetrə çatdırılacaq.

Uzunluğu 878 kilometr və ilkin ötürücülük gücü ildə 10 milyard kubmetr qaz olan "Trans-Adriatik" (TAP) boru kəməri isə Avropanın üç ölkəsinin ərazisindən – Yunanıstan, Albaniya və İtaliyadan keçir. TAP qaz boru kəməri layihəsi üzrə işlərin - mühəndis, təchizat və tikinti işləri də daxil olmaqla ümumilikdə 70 faizdən çoxu yekunlaşıb. Avropaya ilk Azərbaycan qazının verilməsi 2020-ci ilə planlaşdırılır. TAP boru kəməri də istifadəyə verildikdən sonra Avropa İttifaqı (Aİ) üçün prioritet enerji layihələrindən olan Cənub Qaz Dəhlizi tamamlanmış olacaq.