Lavrov avropalı diplomatların qəbulu prosesində dəyişiklikləri açıqlayıb

Lavrov: Rusiya Qərb səfirlərinin təmaslarla bağlı müraciətlərinə ayrıca baxmağa başlayacaq.

İndi Rusiya Moskvadakı avropalı diplomatlarla təmaslar üçün hər bir müraciəti ayrıca nəzərdən keçirəcək və razılaşıb-razılaşmamağa qərar verəcək. Onların qəbulu prosesində dəyişiklik barədə Rusiyanın xarici işlər naziri Sergey Lavrov “İzvestiya”ya müsahibəsində bildirib.

Rusiya Xarici İşlər Nazirliyinin rəhbəri xatırladıb ki, Avropa İttifaqı (Aİ) ölkələrinin səfirləri Rusiyada keçiriləcək prezident seçkilərini müzakirə etmək üçün onunla görüşə gəlməkdən imtina ediblər.

“Biz onlara bildirmişik ki, bundan sonra istənilən səviyyədə, istər səfir, istər attaşe, istərsə də “arada olan” hər kəs Rusiya hakimiyyəti ilə əlaqə saxlamaqda maraqlı olarsa, biz hər bir sorğunu ayrıca nəzərdən keçirəcəyik və qərar qəbul edəcəyik”, - deyə o qeyd edib.

Bundan əvvəl Avropa İttifaqının Rusiyadakı səfiri Roland Qaralaq bildirmişdi ki, Aİ ölkələrinin səfirləri Lavrovla görüşdən imtina etdikdən sonra Moskvadan ölkəni tərk etmək zərurəti ilə bağlı siqnallar almayıb. O qeyd edib ki, Rusiya XİN rəhbəri ilə görüşdən imtina haqlıdır və diplomatlar Rusiyadan mümkün qovulmaqdan qorxmurlar.