Xüsusi qayğıya ehtiyacı olan uşaqların informasiya və təhsil imkanları müzakirə edilib

03.08.2018 Sosial
Gəncə şəhərində xüsusi qayğıya ehtiyacı olan uşaqlar və gənclər üçün təşkil edilən “E-iştirakçılıq və Onlayn təhsil” mövzusunda 3 günlük seminar başa çatıb.

"Kommersant.az" bildirir ki, AZƏRTAC-ın bölgə müxbirinin xəbərinə görə, tədbir Azərbaycan Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə yardımı ilə Gəncə Avro-Atlantik Məlumat Mərkəzi tərəfindən icra olunan “Azərbaycanın qərb bölgəsində sağlamlıq imkanları məhdud olan uşaqların və gənclərin informasiya, təhsil və məşğulluq imkanlarının yaradılması ilə cəmiyyətə inteqrasiya imkanlarının gücləndirilməsi” layihəsi çərçivəsində təşkil olunub.
Tədbiri açan Gəncə Avro-Atlantik Məlumat Mərkəzi İdarə Heyətinin sədri Mehman Xəlilov bildirib ki, xüsusi qayğıya ehtiyacı olan uşaqların və gənclərin cəmiyyətə inteqrasiyası, ümumi inkişafı baxımından təhsil, o cümlədən onlayn təhsil ən əhəmiyyətli amillərdən biridir.
Bununla bağlı xüsusi qayğıya ehtiyacı olan uşaqlara və gənclərə digər həmyaşıdları ilə bərabər təhsil imkanlarının yaradılması məqsədilə dövlət tərəfindən qəbul edilmiş proqramlarda və strateji fəaliyyət planlarında xüsusi yer ayrılıb ki, bu da xüsusi qayğıya ehtiyacı olan uşaqların və gənclərin cəmiyyətə inteqrasiyasına öz töhfəsini verir.
Bu baxımdan xüsusi qayğıya ehtiyacı olan uşaqların və gənclərin iştirakı ilə “E-iştirakçılıq və Onlayn təhsil” mövzusunda keçirilən bu seminar onların informasiya və təhsil imkanlarının genişləndirilməsi kontekstində olduqca əhəmiyyətli bir tədbirdir.
Tədbirin məruzəçi eksperti Azərbaycan Milli Elmlər Akademiyasının Tarix İnstitutunun aparıcı elmi işçisi Əhməd Quliyev xüsusi təqdimatla çıxış edərək tədbir iştirakçılarına “Təqdimatların hazırlanması”, “İdeyaların mübadiləsi”, “Evdən kənara çıxmadan işləmək və təhsil almaq imkanları”, “Sənədlərin və dərslərin paylaşılması” və “Onlayn öyrənmə” mövzularında geniş məlumatlar verib.
Qeyd edilib ki, Gəncə şəhəri və ətraf rayonlarda yaşayan sağlamlıq imkanları məhdud olan uşaqların və gənclərin cəmiyyətə inteqrasiya imkanlarını gücləndirilməsi məqsədi daşıyan bu tədbir “Azərbaycan 2020: gələcəyə baxış” İnkişaf Konsepsiyasına, “2018-2024-cü illərdə Azərbaycanda sağlamlıq imkanları məhdud şəxslər üçün inklüziv təhsilin inkişafı üzrə” və “Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”na uyğundur.
On iki nəfərdən çox xüsusi qayğıya ehtiyacı olan uşaqların və gənclərin, həmçinin onların valideynlərinin və layihənin könüllülərinin iştirakı ilə həyata keçirilən tədbirin sonunda xüsusi qayğıya ehtiyacı olan uşaqların və gənclərin cəmiyyətə inteqrasiyası, həmçinin informasiya və təhsil imkanlarının genişləndirilməsi məsələlərinin bir sıra aspektləri ətrafında müzakirələr və fikir mübadiləsi aparılıb.