4 milyard dollarlıq mal əlində qaldı

29.06.2018 Maliyyə
Dünyanın ən böyük ikinci geyim şəbəkəsi İsveçin "Hennes & Mauritz" (H&M) şirkətinin ehtiyatları (stokları) 4 milyard dollara çıxıb. Şirkət yeni qiymət endirimləri edəcək.

"Kommersant" xəbər verir ki, H&M, dünya miqyasında əlində qalan və illərdir yığılan paltar ehtiyatının 4 milyard dollara çatdığını açıqlayıb

Bu, H&M-in satış problemlərinin davam etdiyini göstərir, əvvəlki illə müqayisədə ehtiyatlar 13 faiz artmışdır.

Satışların gözləntiləri qarşılamaması səbəbindən toplanan ehtiyatlar 2018-in ilk yarısında şirkətin mənfəətini 28% azaldıb.

4700-dən çox mağazası olan H&M, uzun müddətdir ehtiyat artımını dayandırmağa çalışır. Sürətlə dəyişən moda trendləri və istehlakçıların alternativ markalara yönəlməsi H&M-ə ehtiyatlarını "əritməyi" çətinləşdirir.

Şirkətin son analitik iclasında verilən məlumata görə, anbarlarda yığılmış geyimləri azaltmaq üçün qiymət endirimləri planlaşdırılır.