Türkiyədə təyyarə biletinin qiymətləri düşəcək

22.05.2018 Dünya
"İstanbul Yeni hava limanı"nın 29 oktyabrda fəaliyyətə başlaması üçün işlər davam edir

"Kommersant.az" xəbər verir ki, "Yeni hava limanı"nın açılması ilə biletlərin qiyməti də aşağı düşəcək.

Türk hava yollarının (THY) baş direktoru Bilal Ekşi təyyarə biletlərinin qiymətinin rəqabət əsasında tənzimləndiyini qeyd edib: "Neft qiymətləri və dolların məzənnəsindəki yüksəliş qiymətlərə az da olsa təsir edib. "Yeni hava limanı" rəqabəti artıracaq, bu da bilet qiymətlərinə təsir edəcək. Qiymətlər az da olsa düşəcək”.

"İstanbul Yeni hava limanı"na transfer proqramı da dəqiqləşdirilib. Proqrama əsasən, 25 oktyabr 2018-ci ilə qədər yeni hava limanında sınaq uçuşlarından başqa hər hansı uçuş təşkil edilməyəcək. 31 oktyabr 2018-ci il, saat 00:00-dan etibarən Atatürk hava limanı daxili və xarici uçuşları dayandıracaq. Hazırda işlərinin 88,5%-i başa çatdırılan "İstanbul Yeni Hava limanı"nın rəsmi açılış mərasimi 29 oktyabr 2018-ci ildə keçiriləcək.