14.02.2023 Bank

24 0

Kommersant.az xəbər verir ki, bankların açıqladığı maliyyə hesabatına görə, xalis faiz zərəri olan bank olmayıb. Amma istisnalar hər zaman olduğu kimi burada da var. Belə ki, banklarımızdan 2-si xalis faiz gəlirini azaldıb. Geri qalan 23 bank isə sözügedən gəlirini daha da artırıb. Azalma göstərən bankların ikisi də korporativ banklardır.

XALİS FAİZ GƏLİRİ AZALAN BANKLAR

Digər renkinqlərdə olduğu kimi “Bank BTB” xalis faiz gəlirinin azaldığı haqda məlumat verib. Bakının Ticarət Bankının sözügedən gəliri 600 min manat və ya 5,9% azalaraq 9 milyon 530 min manata enib.

“Günay Bank”da xalis faiz gəlirini 1 milyon 614 min manat və ya 32,6% azalaraq 3 milyon 336 min manata düşüb.

KORPORATİV BANKLAR

Korporativ banklar arasında ən yüksək xalis faiz gəlirinə “Kapital Bank” sahib olub. Onun sözügedən gəliri 29,6% artaraq 525 milyon 313 min manata çatıb. Beləliklə, "Paşanın bankı" rəqiblərini geridə qoyaraq liderlik kürsüsünə əyləşib.

Farsların bankı istisna olmaqla, xalis faiz gəliri ən az olan korporativ bank “Günay Bank” olub. Onun sözügedən gəliri 3 milyon 336 min manat olub ki, bu da 2021-ci ilin sonu ilə müqayisədə 32,6% azdır. "Günayın bankı" bu imtahandan kəsilərək "sinifdə qalıb".

RETAİL BANKLAR

RETAİL banklar arasında “Bank Respublika” rəqiblərinə aman verməyərək stolun başında oturub. Onun xalis faiz gəliri 84 milyon 791 min manat olub ki, bu da 2021-ci ilin son rübü ilə müqayisədə 28 milyon 33 min manat və ya 49,4% çoxdur.

“Bank VTB”nin Azərbaycan filialı RETAİL banklar arasında ən az xalis faiz gəliri əldə edən bankdır. Rusların bankının xalis faiz gəliri 1 il ərzində 4 milyon 294 min manat və ya 35,7% artaraq 16 milyon 313 min manata çatıb. Amma buna baxmayaraq, sözügedən bank digər bazar iştirakçılarından geri qalıb.