28.03.2019 İnşaat və Əmlak

0 0

"Kommersant.az" xəbər verir ki, güzəştli şərtlərlə əldə edilmiş 152 mənzildən 37-si 1 otaqlı, 83-ü 2 otaqlı, 32-si isə 3 otaqlıdır. Mənzilə sahib olmuş vətəndaşlardan 34-ü mənzili öz vəsaiti hesabına, 118-i isə güzəştli ipoteka krediti hesabına əldə etmişdir.

Mənzilləri əldə etmiş vətəndaşlardan ilkin olaraq 6%-i “Güzəştli mənzil” sistemində qeydiyyat zamanı mənzili öz vəsaiti hesabına almaq niyyətini bildirsə də, alqı-satqı zamanı bu rəqəm 22%-ə qədər yüksəlmişdir. Mənzilləri öz vəsaiti hesabına əldə edən vətəndaşlar Agentlik tərəfindən tətbiq edilmiş əlavə endirimlərdən yararlanaraq:

1 otaqlı mənzil üçün 28 301 manat (endirimdən əvvəl bu məbləğ 31 445 manat olmuşdur);

2 otaqlı mənzil üçün 42 904 manat (endirimdən əvvəl bu məbləğ 47 671 manat olmuşdur);

3 otaqlı mənzil üçün 59 432 manat (endirimdən əvvəl bu məbləğ 66 035 manat olmuşdur) ödəniş etmişdir.

Bununla yanaşı, mənzilə güzəştli ipoteka krediti vasitəsilə sahibolan vətəndaşlara da endirimlər tətbiq olunmuşdur. Həmin şəxslərdən 33%-i minimal tələbdən artıq ilkin ödəniş etdiyindən 10% həcmində əlavə endirimlə mənzilə sahib olmuşdur. Nəticədə:

1 otaqlı mənzil üçün aylıq ödəniş 92 manatdan (360 ay müddətinə; Satış elanında 1 otaqlı mənzil üçün 129-136 manat aylıq ödəniş qeyd olunmuşdur);

2 otaqlı mənzil üçün aylıq ödəniş 142 manatdan (360 ay müddətinə; Satış elanında 2 otaqlı mənzil üçün 205-236 manat aylıq ödəniş qeyd olunmuşdur);

3 otaqlı mənzil üçün aylıq ödəniş 269 manatdan (360 ay müddətinə; Satış elanında 3 otaqlı mənzil üçün 283-288 manat aylıq ödəniş qeyd olunmuşdur) başlayır.

Mənzil əldə etmiş vətəndaşlar arasında ən azı 3 il hərbi xidmətdə olan, həmçinin ehtiyata və istefaya buraxılmış Azərbaycan Respublikasının hərbi qulluqçuları, ən azı 3 il dövlət qulluğunda qulluq edən, o cümlədən dövlət qulluğunun xüsusi növündə xidmət keçən şəxslər və ən azı 3 il daxili işlər orqanlarında xidmət keçən xüsusi rütbəsi olan şəxslər üstünlük təşkil edir. Ümumilikdə mənzil alanların 58%-nin yaşı 35-ə qədərdir.

Vətəndaşlar tərəfindən seçilən, lakin sonradan əldə etmədikləri mənzillərin sayı isə 22-dir (7-si 1 otaqlı, 9-u 2 otaqlı, 6-sı 3 otaqlı). Həmin mənzillər növbəti elanda digər mənzillərlə birlikdə yenidən satışa çıxarılacaqdır.

Mənzillərin əldə edilməməsinin səbəbləri:

• Seçdiyi mənzilin otaq sayı və mərtəbəliliyi ilə bağlı qərarını sonradan dəyişdiyinə görə – 5 nəfər;
• Ailənin gəliri güzəştli ipoteka krediti əldə etməyə və mənzili öz vəsaiti hesabına almağa kifayət etmədiyinə görə – 10 nəfər;
• Güzəştli kateqoriyaya aid statusunu itirdiyindən ipoteka krediti verilmədiyinə görə – 3 nəfər; (“Gənc ailə” (35 yaş) statusunu itirdiyindən – 2 nəfər, iş yerini tərk edən – 1 nəfər)
• Yaşı ipoteka kreditinin verilməsi həddini keçdiyinə görə (63 yaş və yuxarı) – 2 nəfər;
• Şəxsi səbəblərə görə – 2 nəfər.

Satışın nəticələri barədə statistik məlumatlarla daha ətarflı buradan tanış ola bilərsiniz.

Qeyd edək ki, Yasamal Yaşayış Kompleksində mənzillərin 05.09.2018-ci il və 25.01.2019-cu il tarixlərində həyata keçirilən satışların nəticəsində ümumilikdə 430 nəfər güzəştli mənzilə sahib olmuşdur. “Güzəştli mənzil” sistemində elektron kabinet verilmiş şəxslərin sayı hazırda 10 543 nəfərdir. Yaxın vaxtlarda Yasamal Yaşayış Kompleksində mənzillərin satışı ilə bağlı növbəti elan veriləcəkdir.