Səhiyyə Nazirliyi TƏBİB-lə bağlı olan məsələyə aydınlıq gətirdi: Bu, o anlama gəlməməlidir ki...

“COVİD-19-la bağlı yaranan problemlərin aradan götürülməsi məqsədilə Nazirlər Kabineti yanında Operativ Qərargah Səhiyyə Nazirliyinə tapşırıq verib ki, metodik tövsiyələri, təşkilati məsələlərdə dəstəyi ilə İcbari Tibbi Sığorta üzrə Dövlət Agentliyinin poliklinikalarına yardım etsin. Yəni bir səhiyyə qurumuna tapşırılıb ki, digər səhiyyə qurumuna yardımçı olsun”.

"Kommersant.az"-ın xəbərinə görə, bunu Səhiyyə Nazirliyinin Mətbuat xidmətinin rəhbəri Pərviz Abubəkirov deyib.

"Bu gündən sonra Azərbaycanda fəaliyyət göstərən səhiyyə qurumları birlikdə COVİD-19-a qarşı mübarizə aparacaqlar. Bunu elə bir anlama gətirmək ki, bu tapşırıq poliklinikaların bir qurumdan alınıb digər quruma verilməsi deməkdir, bu, səhv yanaşmadır. Çünki İcbari Tibbi Sığorta üzrə Dövlət Agentliyi də, TƏBİB-də, Səhiyyə Nazirliyi də dövlət qurumudur. Poliklinikalar da dövlət poliklinikalarıdır. Poliklinikalarda xəstəliyin müəyyənləşdirilməsi üçün sualların alqoritminin yaradılması, hansı telefonla zəng gələndə hansı suallara cavab vermək, xəstəyə hansı sualları vermək lazımdır ki, müəyyənləşdirilsin, sahə həkimləri evdə müalicə alan xəstələrə hansı qaydada gedib yardım etməlidir və s. məsələlər bura aiddir" – P.Abubəkirov bildirib.