"Ölkədə ildən-ilə daxili istehsal zəifləyir, onun yerini idxal tutur"

"Ölkədə ildən-ilə daxili istehsal zəifləyir, onun yerini idxal tutur" - AÇIQLAMA

"Rusiyaya sanksiyalar səbəbindən dəstək vermək prizmasından yanaşsaq görərik ki, Azərbaycan bazarı Rusiyanın ixrac etdiyi məhsulların 0.01 faizi deyil. Bu da Rusiya üçün elə də əhəmiyyətli bazar sayılmır".

Kommersant.az-a açıqlamasında iqtisadçı Akif Nəsirli Rusiyadan idxal olunan qida və qeyri-qida məhsullarının həcminin artma səbəblərindən danışarkən deyib.

İqtisadçı bildirib ki, indi vəziyyət bir az fərqlidir:

"Ümumiyyətlə Azərbaycanla Rusiya arasında iqtisadi əlaqələr əvvələr də dərin idi. Biz Rusiyadan kifayət qədər ərzaq məhsulu alırdıq. Kənd təsərrüfatı məhsullarından təkcə idxal olunan ərzaq buğdasının 90 faizi Rusiyadan gəlirdi. Rusiyanın artıq sankiyalardan dolayı xarici bazara çıxışı məhdudlaşır, Azərbaycanın isə həmin məhsullara ehtiyacı ildən-ilə artır. Ona görə də burda mövqelər üst-üstə düşür".

Akif Nəsirli bildirib ki, ölkədə ildən-ilə daxili istehsal zəifləyir və onun yerini idxal tutur:

"İdxal etdiyimiz məhsullar isə Avropa ölkələrindən baha başa gəlir. Amma Rusiyadan gələn məhsulların keyfiyyəti bir qədər aşağı olsa da, Avropa ölkələrinə nisbətən qiyməti münasib olur. Yəni Rusiya və Azərbaycanın maraqlarının üst-üstə düşməsi bu ölkədən idaxalı artırır. Bir faktı deyim ki, Rusiyada dünya əhalisinin 2 faizi, sərvətlərinin isə 40 faizi cəmləşib. Rusiyada yeganə çatışmazlıq intelektdir. Bu ölkədən indiyənə qədər beyin axını olmasa idi, dünyanın gücü ona çatmazdı".