17.03.2023 İqtisadiyyat

18 2

“63 yaşı var deyib, savadlıları təqaüdə göndərir, yerinə savadsız gənci götürürlər” - Sosioloq

Kommersant.az xəbər verir ki, bunu sosioloq Əhməd Qəşəmoğlu Milli Məclisin bugünkü iclasında deputat Əhliman Əmiraslanovun müəllim və həkimlərin təqaüd yaşlarının istisna hallarda 70-ə qaldırılması ilə bağlı səsləndirdiyi təklifi şərh edərkən deyib.

Sosioloq qeyd edib ki, ölkədə rəqəmlə oynamaq dəb halında olub, amma burada məsələ başqadır:

“Elə müəllim var ki, 70 yaşında tamamilə enerji ilə doludur, çox yüksək səviyyədə dərs deyə bilir. Eləsi də var, tam əksinədir. Ona görə 70 yaşı normal yaş hesab etmək olar. 70 yaşında elə müəllimlər tanıyıram ki, çox yüksək səviyyədə dərs deyə bilir. Bəzən 63 yaşı var deyib, çox savadlıları təqaüdə göndərir, yerinə savadsız gəncləri götürürlər. Bu, birmənalı olaraq doğru deyil. Müəllimi işdə həm yaşa, həm də göstəricilərinə görə saxlamaq lazımdır. Onun dərs dediyi şagirdlərin statistik göstəriciləri, özünün sağlamlıq durumu nəzərə alınmalıdır. O müəllimlər zamanında özləri qəbul olub, oxuyub, işə giriblər. Bəzi gənclər isə rüşvətlə qəbul olub, oxuyub, elə rüşvətlə də iş tapıblar. Bir göstəricini götürüb təqaüdə göndərmək savadsızlıqdır”.

Əhməd Qəşəmoğlu qeyd edib ki, eyni sözü həkimlər haqqında da demək olar:

"Baxırsan ki, çox nadir bir həkim var, onu axtarırsan, deyirlər yaşa görə təqaüdə göndərildi. Sənin bu ölkədə onu əvəz edəcək həkimin yoxdursa, həmin həkimi təqaüdə göndərmək nadanlıqdır. Əgər insanın beyni işləyirsə, düzgün diaqnoz qoya, müalicə edə bilirsə, təbii ki, işləməlidir. Müəyyən yaşdan sonra o insan yararlıdırsa, hələ də işləyə bilirsə, onun əməkhaqqına müəyyən əlavələr olunsun. Onların maaşına əlavələr edib, işdə saxlamaq lazımdır, işdən çıxarmaq doğru deyil”.

Yaşlı müəllim və həkimlərin yeni texnologiya ilə işləmə bacarığından da danışan sosioloq qeyd edib ki, texnologiya ilə işləmək qabilliyyətli müəllimin yaşına baxmır:

"Əgər müəllim və həkim bilsə ki, yaşına görə yox, texnologiya ilə bacarmadığna görə təqaüdə göndərilir, o geri qalmayacaq. Həmin müəllim və həkim də müasir texnologiyaları biləcək”.