Tesla narazılıqlara rəğmən giqafabrikini genişlətdi

Teslanın Almaniyanın paytaxtı Berlin yaxınlığındakı Qrünheydedəki gigafabrikasını meşəlikdən istifadə edərək genişləndirmək planı yerli sakinlər və ətraf mühit fəallarının etirazına baxmayaraq, yerli şəhər şurası tərəfindən təsdiqlənib.

Berlin yaxınlığındakı Grünheide Bələdiyyəsi Teslanın Avropadakı ilk fabriki olan "Giga Berlin"in ərazisinin mübahisəli şəkildə genişləndirilməsini təsdiqləyib.

Polisin himayəsində olan yerli şurada keçirilən səsvermədə 11 üzv yenidən işlənmiş rayonlaşdırma planını dəstəkləyib, 6 üzv əleyhinə, 2 üzv isə bitərəf qalıb. Maraqlıdır ki, sözügedən təsdiq qərarı ətraf mühit sakinləri və iqlim fəallarının etirazları və tənqidlərindən sonra qəbul edilib.

İlon Maska məxsus Tesla hazırda 300 hektar sahədə qurulan fabrikini 100 hektardan çox genişləndirəcəkdi. Bununla belə, sakinlər fevral ayında Grünheide şəhərində keçirilən səsvermədə fabrikin genişləndirilməsinin əleyhinə səs verdikdən sonra Tesla fabrikinin genişləndirilməsi planını azaltmalı oldu.

Sakinlərin narahatlığına genişlənmə üçün tələb olunan meşələrin qırılması, zavodun çox su sərf etməsi və ərazidə yol hərəkətinin artması daxildir.

Yeni təklifdə Tesla zavod ərazisindəki uşaq bağçaları kimi personal obyektləri üçün planları ləğv etdi, ilkin olaraq planlaşdırılan genişləndirmə sahəsini 100 hektardan təxminən 50 hektara endirdi və sakinlərin narahatlıqlarını həll edəcəyinə əmin etdi.

İqlim fəalları fevral ayından bəri Tesla zavodunun genişləndirilməsinə və ağac evlərinin düşərgəsində meşələrin qırılmasına etiraz edirlər.

Etirazçılar siyasətçilərdən obyektin genişləndirilməsinin əleyhinə olan vətəndaşların səslərinə hörmətlə yanaşmağı və səsvermənin nəticələrini icra etməyi tələb ediblər. Fəallar fabrikin yanındakı meşə sahəsinin Tesla tərəfindən zəbt edildiyini iddia edərək, ərazidəki içməli su sahələrini qorumaq istəyiblər.

“Giga Berlin” adı ilə tanınan və 12 min nəfərin çalışdığı zavod akkumulyatorlar, güc aqreqatları və nəqliyyat vasitələri istehsal edir.