Temu vs Trendyol: Hansı platforma alış-verişdə daha çox qazandırır?

Temu vs Trendyol: Hansı platforma alış-verişdə daha çox qazandırır? - ARAŞDIRMA

Online alış-veriş son illərdə həyatımızın ən rahat vərdişlərindən birinə çevrilib. İstədiyimiz məhsulu evdən çıxmadan, cəmi bir neçə kliklə əldə etmək artıq adi haldır.

Kommersant.az xəbər verir ki, bu sahədə diqqət çəkən iki böyük platforma var: Temu və Trendyol. Hər ikisinin öz auditoriyası olsa da, son zamanlar Temudan daha çox danışılır. Bəs, hansını seçmək daha sərfəlidir?

1. Qiymət və Endirimlər – Temu bir addım öndə

Temu – Sərfəli alış-verişin ünvanıdır. Eyni məhsulu bazarda gördüyünüz qiymətin yarısına, bəzən isə üçdə birinə almaq mümkündür. Hətta kampaniya vaxtlarında “bu qədər ucuz ola bilməz” dedirdən qiymətlər təklif olunur. Bir çox məhsul birbaşa istehsalçıdan gəldiyi üçün əlavə vasitəçi xərcləri yoxdur.

Trendyol – Qiymətlər yerli bazara görə normaldır, endirim günlərində yaxşı fürsətlər olur. Lakin, Temu ilə müqayisədə ümumi qiymət səviyyəsi yüksəkdir.

2. Çatdırılma

Temu – Çatdırılma 7–15 gün çəkir, bəzən daha uzun ola bilər. Amma bu müddətə baxmayaraq, müştərilər tez-tez məhsulun keyfiyyətinə və qiymətinə görə “gözləməyə dəyər” deyirlər.

Trendyol – Çatdırılma adətən 7–10 gün ərzində baş tutur. Lakin bəzi bölgələrdə və kampaniya dövrlərində sifarişlərin gecikməsi müşahidə olunur.

3. Keyfiyyət

Temu – Həmişə ucuz qiymət yüksək keyfiyyət deməsə də, platformada həm keyfiyyətli, həm də keyfiyyətsiz məhsullar var. Üstəlik, müştəri rəyləri və real fotoşəkillər seçim etməyə kömək edir. Çox vaxt alıcılar gözlədiyindən daha yaxşı məhsul aldıqlarını deyirlər.

Trendyol – Rəsmi brend mağazaları olsa da, burada da keyfiyyətsiz məhsullar kifayət qədərdir. Satıcıya görə məhsulun keyfiyyəti dəyişir, hətta bəzən foto ilə real məhsul arasında ciddi fərq olur.

4. Müştəri Xidməti və Geri Qaytarma

Temu – Müştəri dostu qaydaları ilə seçilir. Məhsul geciksə, kompensasiya verir, qüsurlu çıxsa, pulu dərhal geri qaytarır. Bəzən məhsulu geri göndərmədən ödəniş edilir. Bu rahatlıq müştərilərin Temu-ya olan etimadını artırır.

Trendyol – Qaytarma prosesi nizamlıdır, amma Temu qədər çevik deyil. Satıcıdan asılı olaraq proses bəzən uzana bilir.

5. Ümumi İstifadə Təcrübəsi

Temu – Fərqli və sərfəli məhsullar axtaranlar üçün ideal seçimdir. Qiymət, endirim və müştəri yönümlü qaydaları ilə yeni istifadəçiləri asanlıqla cəlb edir.

Trendyol – Daha çox tanınmış brendlər və daha tez çatdırılmanı üstün tutanlar üçün münasibdir, amma qiymət baxımından Temu ilə rəqabətdə çətinlik çəkir.

Nəticədə, əgər minimum büdcə ilə maksimum məhsul almaq istəyirsinizsə, üstəlik müştəri yönümlü xidmət sizin üçün vacibdirsə – Temu daha sərfəlidir. Əgər tez çatdırılma və tanınmış brendlər sizin üçün ön plandadırsa, Trendyol yaxşı seçim ola bilər, amma keyfiyyət məsələsində burada da risk var.

Əslində, vəziyyətə görə hər iki platformadan yararlanmaq ən optimal yanaşmadır – gündəlik ucuz alış-veriş üçün Temu, brend markalar üçün isə Trendyol.

Qeyd edək ki, hər iki platforma ilə rəqabətə girə bilmədiyi və çevik olmadığı üçün "Umico" e-ticarət saytı yazıda yer almayıb. Sözügedən saytla bağlı ətraflı və xüsusi yazı dərc ediləcək.