Metyu Brayza: "Cənub Qaz Dəhlizi Azərbaycanın rəqabət gücünü artıracaq"

31.05.2018 Energetika
"Cənub Qaz Dəhlizinin əsas ideyası ondan ibarətdir ki, bu layihə Azərbaycanın suverenliyini daha da gücləndirəcək və bazardakı rəqabət qabiliyyətini daha da artıracaq. Beləliklə, yavaş-yavaş "Qazprom"un Avropada adi şirkət olacağı vəziyyəti yarana bilər".

"Kommersant.Az" xəbər verir ki, bunu açıqlamasında Atlantik Şuranın analitiki, ABŞ-ın Azərbaycandakı keçmiş səfiri Metyu Brayza deyib.

Onun fikrincə, Cənub Qaz Dəhlizinin işə salınması irəliyə doğru atılmış addımdır: "Bu, həm Azərbaycan, həm də Avropa üçün böyük uğurdur".

Ekspert SOCAR-ın dünya enerji bazarındakı fəaliyyətini yüksək qiymətləndirib: "SOCAR yalnız Cənubi Qafqazda və Türkiyədə strateji rol oynamır, o həm də addım-addım Avropada rolunu artırır. Mən bununla fəxr edirəm".

O, həmçinin Trans-Xəzər qaz kəmərinin tikintisi perspektivlərini və Moskvanın bunun Xəzər dənizinin ekologiyasına mənfi təsir göstərə biləcəyinə dair bəyanatlarını şərh edib: "Bu, ya siyasi, ya iqtisadi səbəblərdən kəmərin inşasını istəməyənlər tərəfdən blef, boş sözlərdir. Bu dənizdə çoxlu neft kəmərləri inşa edilə bilərsə, nə üçün ətraf mühitə mənfi təsir etməyəcək qaz kəməri inşa olunmasın?! Şimal axını inşa edilə bilirsə, nə üçün Trans-Xəzər qaz kəməri inşa edilməsin?! Bunun qarşısında maneə görmürəm".