Dünya maliyyə bazarları ilə bağlı həftəlik analiz

19.06.2018 Birja
InvestAZ İnvestisiya şirkətinin analitikləri bu həftə üzrə dünya maliyyə bazarlarında son vəziyyət və qısa müddət ərzində gözlənilənlərlə bağlı məlumat verib.

EUR

Dünya valyuta birjalarında avronun qiyməti Avropa Mərkəzi Bankının (AMB) açıqlamalarından sonra 1.1542$-a kimi 3% ucuzlaşsa da, yenidən bahalaşaraq 1.1620$-a ticarət edilməkdədir. Təhlillərə əsasən, EUR/USD məzənnəsi yenidən 1.1542$-ı aşağı istiqamətdə qırarsa, 1.1447$-a kimi də ucuzlaşa bilər.

AMB-nin yumşaq monetar siyasətindən uzaqlaşması niyyətinin, Avrozona iqtisadiyyatında vəziyyətin hələ kövrək olduğu bir vaxta təsadüf etməsi, avroya olan təzyiqlərin artmasına səbəb olur.

GBP

Funt sterlinq də ucuzlaşır. Hal-hazırda 1.33$-ın altında ticarət edilən GBP/USD məzənnəsi 1.3210$-ı da aşağı istiqamətdə qırarsa, 1.3130$-a kimi də dəyər itirə bilər.

İngiltərədə iqtisadi və siyasi risklərin mövcudluğu, funt sterlinqə təsir edən əsas amillərdir. Bununla yanaşı, cümə axşamı saat 15:00-da dərc ediləcək İngiltərə Mərkəzi Bankının faiz qərarı da investorların diqqət mərkəzindədir.

TRY

Türkiyə bazarlarında da dollar 4.71TL-nin üzərində ticarət edilməkdədir və USD/TRY məzənnəsi 4.76TL-ni də yuxarı istiqamətdə qırarsa, 4.82TL-yə kimi bahalaşa bilər.

Türkiyədə iyun ayının 24-də baş tutacaq prezident seçkisi öncəsi dünya maliyyə bazarlarında lirəyə qarşı risklər yüksək olaraq qalır.

OIL

Enerji bazarlarında isə yenidən 75.50$-a kimi dəyər qazanan Brent nefti, 74.80$-a kimi qismən korreksiya etsə də, texniki analizlərə əsasən yenidən bahalaşa bilər. Belə ki, 75.50$-ın yenidən yuxarı istiqamətdə qırılması ilə artım dalğası 76.40 və 77.40$-a kimi sürətlənə bilər. Bu həftənin çərşənbə günü saat 18:30-da yayımlanacaq ABŞ-ın neft ehtiyatları ilə bağlı statistik məlumatların da qiymətə güclü təsir edəcəyi gözlənilir.

GOLD

Əlvan metallar bazarlarında da qızılın qiymətində güclü ucuzlaşma müşahidə edilib. Artıq 1300$-ın (41.7 $/qram) altında ticarət edilən, qızılın bir unsiya üzrə qiyməti 1273$-a (40.8 $/qram) kimi ucuzlaşaraq, bu səviyyənin altında qalarsa, 1260$-a (40.4 $/qram) kimi də dəyər itirə biləcəyi proqnozlaşdırılır.

“İnvest-AZ İnvestisiya Şirkəti” QSC-nin Analitika Departamenti

“İnvest-AZ İnvestisiya Şirkəti” Qapalı Səhmdar Cəmiyyətinin fəaliyyəti Azərbaycan Respublikası Maliyyə Bazarlarına Nəzarət Palatası tərəfindən tənzimlənir. Şirkət, 09.01.2016-cı il tarixli 087986 saylı lisenziyası əsasında broker, anderraytinq (diler), marja ticarəti (forex), fərdi investorların portfelinin idarə edilməsi, market meykerlik və sair investisiya xidmətləri üzrə fəaliyyət göstərməkdədir.

Risk bildirişi.

Yuxarıda göstərilən məlumatlar tamamilə tövsiyə xarakterlidir. Bu fəaliyyət üzrə həyata keçirilən əməliyyatlar yüksək risk qrupuna daxildir və “İnvest-AZ İnvestisiya Şirkəti” QSC yuxarıda göstərilən məlumatlar əsas götürülməklə, həyata keçirilən investisiya əməliyyatları üzrə heç bir öhdəlik daşımır.

  • Əvvəlki

    Trampdan Çinə daha 200 milyard dollarlıq əlavə vergi

Digər xəbərlər