Fələstindən İsrailə ittiham: BMT TŞ-nin humanitar yardım qərarı bloklanır

Fələstin İsrail hökumətini Birləşmiş Millətlər Təşkilatının Təhlükəsizlik Şurasının Qəzza zolağına humanitar yardımın çatdırılması ilə bağlı 2720 saylı qətnaməsinin icrasına mane olmaqda ittiham edib.

Fələstin Xarici İşlər Nazirliyindən verilən açıqlamada İsrailin Qəzza zolağının "mülki əhali üçün kütləvi məzarlığa" çevrildiyi bildirilib.

Bəyanatda qeyd olunub ki, "İsrailin Qəzza zolağında artan qırğınları və Fələstin vətəndaşlarına qarşı törətdiyi soyqırımı ən sərt şəkildə pislənilir".

Bəyanatda İsrailin bölgədə gərginliyi artırması "beynəlxalq ictimai rəyə meydan oxumaq" kimi qiymətləndirilib və "İsrail Qəzza zolağının şimalından cənubuna qədər bütün bölgələrdə hücumlarını artırıb, bütün yaşayış məntəqələrini yerlə-yeksan edib.

Açıqlamada vurğulanıb ki, İsrail hökuməti öz siyasəti ilə BMT Təhlükəsizlik Şurasının 2720 saylı qətnaməsinin icrasına mane olmağa çalışır.

Bəyanatda Qəzza zolağında müharibəyə son qoyulması və dərhal atəşkəsin təmin edilməsi üçün BMT Təhlükəsizlik Şurasında qərar qəbul etmək üçün beynəlxalq səylərin gücləndirilməsi çağırışı edilib.