Neft Fondu satdığı dolların məbləği ilə bağlı

Neft Fondu satdığı dolların məbləği ilə bağlı - AÇIQLAMA YAYDI

Azərbaycan Respublikası Dövlət Neft Fonduna (ARDNF) daxil olan sorğulara cavab olaraq bildirir ki, 2020-ci ilin yanvar-iyun aylarında Fond tərəfindən hərraclar vasitəsilə 4 010,1 milyon ABŞ dolları satılıb. Fins.uaz Fonda istinadən xəbər verir ki , bu vəsaitin bir hissəsi (5 675,0 milyon manat) yanvar-iyun ayları ərzində plana uyğun şəkildə dövlət büdcəsinə transfert edilib.

ARDNF 2020-ci ilin ilk 6 ayı üzrə investisiya fəaliyyətinə dair təqdimatını (//www.oilfund.az/storage/uploads/wwfnsts4ng.pdf) ictimaiyyətə açıqlayıb.Təqdimatda da qeyd edilmişdir ki, 01 iyul tarixinə ARDNF-nin aktivlərinin tərkibinə digər valyutalarla yanaşı 586,7 milyon ABŞ dolları ekvivalentində, yəni 997,3 milyon manat daxildir ki, bu vəsait də ARDNF-nin Mərkəzi Bankdakı hesabında saxlanılır və plana uyğun olaraq manatla olan öhdəliklərini yerinə yetirmək məqsədilə istifadə ediləcək.

Yuxarıda qeyd edilənləri nəzərə alaraq bir daha qeyd etmək istərdik ki, ARDNF fəaliyyəti barədə məlumatları daim ictimaiyyətə açıqlayır və bu prosesi davam etdirəcəkdir. Fond hər zaman ictimaiyyətin və media nümayəndələrinin suallarını cavablandırmağa hazırdır.