Unibank-ın rəhbərlərindən biri nüfuzlu beynəlxalq mükafatın finalçısı olub

28.04.2021 Bank
Böyük Britaniyada təhsil almış məzunların uğurlarına və nailiyyətlərinə həsr edilən British Council-ın “Study UK: Alumni Awards” adlı beynəlxalq nüfuzlu mükafatın 2021-ci il qaliblərinin müəyyənləşdirilməsi prosesi davam edir.

Bu il mükafat üzrə 1500-ə yaxın müraciət qəbul edilib. Üç nominasiya üzrə müəyyənləşdirilən mükafatlandırmanın istiqamətlərdən biri də “Peşəkar nailiyyət”dir. Bu nominasiyada namizədin fəaliyyətində böyük uğur qazanması, liderlik bacarıqlarının yüksəkliyi, nailiyyətlərin peşəkarlığın artırılmasında təsiri və cəmiyyətə töhfəsi xüsusilə nəzərə alınır.

“Unibank”ın Baş Hüquq və Komplayens İnzibatçısı və Vəkillər Kollegiyasının üzvü , “Peşəkar nailiyyət” nominasiyası üzrə bu mükafatın Azərbaycan üzrə ilk qalibi Əfqan Baxışov, 2021-ci il mükafatının Dünya üzrə yeddi finalçısından biri seçilib. Əfqan Baxışov Qafqaz ölkələri ilə yanaşı, Rusiya, Ukrayna, Türkiyə kimi böyük ölkələrin də daxil olduğu, ümumilikdə 15 ölkənin aid edildiyi Wider Europe üzrə ən uğurlu təmsilçi müəyyən edilib.

Finalçılar barədə məlumat müxtəlif onlayn kanallar vasitəsilə British Council tərəfindən bütün dünyada yayılır. Mükafatlandırmanın əsas məqsədi ən uğurlu məzunların beynəlxalq səviyyədə tanıdılmasına nail olunmaq, perspektivli şəxslərə uğur hekayələrini yazmaqda dəstək, yüksək nailiyyətləri olan məzunları dövlətləri, cəmiyyətləri üçün daha çox işlər görməyə həvəsləndirməkdir. Builki mükafatlandırma üzrə bir qalib sentyabrda açıqlanacaq.