Neft qiymətləri Tramp və FED-in gözləntiləri ilə yüksəldi

Beynəlxalq bazarlarda Brent markalı neftin bir bareli 68,56 dollara satılıb.

Ötən gün 69,90 dollara kimi bahalaşan Brent markalı neftin qiyməti günü 68,29 dollarla bağladı.

Bu gün saat 09:37-də Brent markalı neft 0,4 faiz artaraq bir barel üçün 68,56 dollar olub. Eyni zamanda, West Texas Intermediate (WTI) markalı xam neftin bir bareli 66,13 dollara satılıb.

Neft qiymətləri ABŞ prezidenti Donald Trampın yaxından izlənilən tariflərlə bağlı açıqlamaları və ABŞ Federal Ehtiyat Sisteminin (FED) pul siyasətini yumşalda biləcəyi gözləntilərinin artması ilə sürətlənib.

Tramp avqustun 1-dən etibarən sektor tariflərindən ayrı olaraq Kanada məhsullarına 35 faizlik tarif tətbiq ediləcəyini açıqlayıb.

Daha yüksək tariflərdən qaçmaq üçün başqa ölkələrdən tranzit keçən malların daha yüksək tariflərə məruz qalacağını vurğulayan Tramp, Kanadadan hər hansı cavab tədbirinin elan edilən tariflərə əlavə ediləcəyini bildirib.