Rusiya neft qiymətlərinin artmasından təxminən 2,7 milyard dollar qazanıb

Rusiyanın neft qiymətlərinin artmasından təxminən 200 milyard rubl qazandığı açıqlanıb. Rusiyanın maliyyə naziri Anton Siluanov ölkə iqtisadiyyatı ilə bağlı müsbət gözləntilərə sahib olduqlarını bildirib.

Rusiyanın maliyyə naziri Anton Siluanov bildirib ki, neft qiymətlərinin son artımı sayəsində Rusiya büdcəsi təxminən 200 milyard rubl (təxminən 2,7 milyard dollar) əlavə gəlir əldə edib.

Rusiyanın "Rossiya-24" dövlət kanalına danışan Siluanov ölkə iqtisadiyyatı ilə bağlı müsbət gözləntilərə malik olduqlarını bildirib.

Neft qiymətlərinin artması ilə yaranan əlavə gəlirə işarə edən Siluanov deyib: "Məbləğ təxminən 200 milyard rubldur. Gəlirlər və büdcə kəsiri son iki ayda təxminən eyni səviyyədə olub".

Neft qiymətləri 120 dollardan yuxarı qalxa bilər

Kreml sözçüsü Dmitri Peskov da "Rossiya-24"ə bildirib ki, Ukrayna qlobal neft qiymətlərinin artmasına baxmayaraq Rusiyanın enerji infrastrukturuna hücum etməyə davam edir.

Dünyanın enerji böhranı yaşadığını vurğulayan Peskov deyib: "Əgər qlobal bazarda neft tədarükümüz daha da azalarsa, hazırda barel üçün 120 dollar olan qiymətlər daha da artacaq".