Anthropic Pentaqonu məhkəməyə verir

Süni intellekt şirkəti Anthropic, ABŞ hərbi təchizat zəncirinə "risk yaratdığı" qərarı səbəbindən milyardlarla dollar gəlir itkisi ilə üzləşə biləcəyini iddia edərək, Pentaqona və bir neçə digər federal agentliyə qarşı məhkəmə iddiası qaldırdı.

Anthropic, ABŞ administrasiyası tərəfindən "təchizat zənciri riski" damğası altında qalmasının həm nüfuzuna, həm də biznes əməliyyatlarına ciddi zərər verəcəyini bildirib. Şirkətin məlumatına görə, bu "damğa" xüsusilə dövlət qurumlarını və təşkilatlarını süni intellekt təminatçısı kimi Anthropic ilə iş görməkdən çəkindirəcək. Şirkət rəsmilərinin fikrincə, bu, Anthropic üçün bu il milyardlarla dollar gəlir itkisinə səbəb ola bilər.

Anthropic-in ABŞ Müdafiə Nazirliyinə qarşı iddiası şirkətlə Pentaqon arasında həftələrlə davam edən gərginlikdə yeni bir mərhələni qeyd edir. Şirkət Pentaqonun süni intellekt texnologiyalarından istifadəyə daha geniş giriş və nəzarət tələblərinə məhdudiyyətlər qoymaqda israr etdikdən sonra gərginlik daha da artıb.

Anthropic-in baş maliyyə direktoru Krişna Rao, müştərilərin Anthropic ilə işləməyin onların hökumət müqavilələrini təhlükə altına aldığına inandıqları təqdirdə "milyardlarla dollarlıq" müqavilələrin risk altında ola biləcəyini bildirib.

Keçən həftə Anthropic, müştərilərinin böyük əksəriyyətinin ABŞ hökumətinin qərarından birbaşa təsirlənməyəcəyini bildirib. Anthropic-in üç əsas texnologiya tərəfdaşı — Amazon, Microsoft və Google — müdafiə müqavilələrindən kənarda şirkətlə əməkdaşlığını davam etdirəcəklərini açıqladılar.