Aİ rus diplomatlarının sərbəst hərəkətinə məhdudiyyətlər qoyur

Avropa İttifaqı hökumətləri artan təxribat cəhdlərinə cavab olaraq rus diplomatların blok daxilində səfərlərini məhdudlaşdırmağa razılaşıblar. Yeni tənzimləmə diplomatlardan vəzifə ölkələrini tərk etməzdən əvvəl digər Aİ hökumətlərini xəbərdar etmələrini tələb edəcək.

Financial Times-ın məlumatına görə, Avropa İttifaqı (Aİ) ölkələri son vaxtlar təxribat fəaliyyətinin artmasına cavab olaraq rus diplomatlarının Aİ daxilində hərəkət azadlığını məhdudlaşdıracaq yeni qaydalar barədə razılığa gəliblər.

Aİ kəşfiyyat agentlikləri bildirirlər ki, bu təxribat cəhdlərinin böyük bir hissəsi diplomatik pərdə altında fəaliyyət göstərən rus agentləri tərəfindən təşkil edilir.

Yeni reqlamentə əsasən, Aİ-yə üzv dövlətlərdə xidmət edən rusiyalı diplomatlar qəbul etdikləri ölkənin sərhədlərini keçməzdən əvvəl digər üzv dövlətlərə səyahət planları barədə məlumat verməli olacaqlar.

Çexiyanın rəhbərlik etdiyi təşəbbüs Brüsselin Ukraynanın işğalına cavab olaraq hazırladığı yeni sanksiyalar paketinin bir hissəsidir. FT-nin diplomatik mənbələrə istinadən verdiyi məlumata görə, əvvəllər buna qarşı çıxan yeganə ölkə olan Macarıstan vetosunu geri götürüb.

Bununla belə, paketin icrası Avstriyanın rusiyalı oliqarx Oleq Deripaskaya qarşı sanksiyaları ləğv etmək təklifi ilə gecikə bilər. Ən azı 12 Aİ paytaxtı Brüsseli məlumatlandırıb ki, paket qəbul edilərsə, onu dəstəkləməyəcəklər.