OPEC-in neft hasilatı avqustda gündəlik 113 min barel artıb

Neft İxrac Edən Ölkələr Təşkilatının (OPEC) neft hasilatı avqust ayında əvvəlki ayla müqayisədə gündəlik 113 min barrel artaraq 27 milyon 450 min barelə çatıb.

OPEC-in aylıq neft bazarı hesabatına görə, hasilatın ən yüksək artımı İran, Nigeriya və İraqda müşahidə olunub. Gündəlik neft hasilatı İranda 143 min barel, Nigeriyada 98 min barel, İraqda 38 min barel artıb.

Qrupun ən böyük istehsalçısı Səudiyyə Ərəbistanında neft tədarükü ötən ay iyul ayına nisbətən gündəlik 88 min barel artıb. Anqolada 60 min barel, Venesuelada isə 42 min barel azalıb. Avqustda OPEK-in xam neft hasilatının qlobal istehsalda payı 27,2 faizə yüksəlib. Qlobal neft hasilatı avqustda iyul ayı ilə müqayisədə dəyişməyib. Buna görə qlobal neft tədarükü avqust ayında təxminən 100 milyon 700 min barel səviyyəsində reallaşdı. OPEC-ə daxil olmayan ölkələrin hasilatı isə eyni dövrdə gündəlik 100 min barel azalaraq 73 milyon 300 min barel olaraq qeydə alınıb.

Ötən ay dünyada neft qazma quyularının sayı 34 ədəd azalaraq 1860-a düşüb. OPEC ölkələrində 6 qazma qurğusu açılıb, OPEC-ə daxil olmayan ölkələrdə isə qazma qurğularının sayı 40 ədəd azalıb.