2024-cü ilin ilk tam Günəş tutulması ABŞ-dan izlənilib

Şimali Amerika qitəsində ilin ilk “tam günəş tutulması”nı Meksika, ABŞ və Kanadada milyonlarla insan müşahidə edib.

Meksikanın Mazatlan şəhərində yerli vaxtla saat 11.07-də başlayan Günəş tutulması ABŞ-ın şimal-şərqinə doğru hərəkət edib və Kanadada saat 17.16-da başa çatıb.

ABŞ-ın 13 ştatında yüzlərlə şəhər və kiçik qəsəbədə milyonlarla insan bu tarixi təbiət hadisəsini xüsusi günəş tutulması eynəkləri və teleskoplarla müşahidə edib.

Tam tutulma təxminən 44 milyon insanın yaşadığı Meksika, ABŞ və Kanada üzərindən 6 min 437 kilometr uzunluğunda və 186 kilometr enində bir marşrut izlədi.

İnsanlar bu marşrut daxilində “tam günəş tutulması”nın şahidi olduğu halda, bu marşrutun xaricində də qismən tutulma müşahidə edilib.

Qismən tutulma Alyaska və Havaydan başqa ABŞ-ın 48 ştatının hamısında görünüb.