“Borrelin çıxışı ikili standartın ən pik nöqtəsidir”

“Borrelin çıxışı ikili standartın ən pik nöqtəsidir” - Razi Nurullayev

“Azərbaycana təzyiqlər yalnız dünənlə, bu günlə başlamır. Azərbaycan ikinci müstəqilliyini qazanandan bəri hər zaman ikili standartlarla üzləşib. Ermənistan Azərbaycan ərazisini işğal etdi, şəhər və kəndlərimizi xarabalığa çevirdi, amma heç bir dünya ölkəsi onu “qəsbkar”, “işğalçı” adlandırmadı. Demədi ki, Ermənistan Azərbaycan ərazisini işğal edib. Necə olur ki, 30 il Ermənistan Azərbaycanın 20 faizini işğal altında saxlaya bilir, amma bir dəfə də olsun “işğalçı” damğası ilə qiymətləndirilməyib. Hələ də Azərbaycan Ermənistanla sərhədi bəlli olmayan yerlərində təhlükəsiziliyini qorumaq üçün addımlar atır, Ermənistanı sülhə məcbur etmək istəyir. Avropanın ali nümayəndəsi isə buna rəğmən deyir ki, Azərbaycan Ermənistan ərazisini “işğal edib”.

Bu sözləri Milli Məclisin depuatı Razi Nurullayev Avropa İttifaqının xarici siyasət və təhlükəsizlik məsələləri üzrə ali nümayəndəsi Cozep Borrelin Azərbaycanın Ermənistan ərazisini “işğal” etdiyi barədə iddiasına münasibət bildirərkən deyib.

Deputat vurğulayıb ki, Borrelin çıxışı ikili standartın ən pik nöqtəsidir:

“Kim nə deyir, desin, Azərbaycan doğru bildiyi yolla getməlidir. Çünki onlar 30 il susqun qalıblar. Biz onların laqeydliyindən öyrənmişik. Bilirik ki, Azərbaycan öz haqq işini özü həll etməli, özünə güvənməlidir. Ona görə də biz doğru bildiyimizi etməliyik. Kim nə deyir, desin, bizim üçün fərq etməz. Qoy onlar birinci desinlər ki, Ermənistan Azərbaycan ərazisini 30 il işğalda saxlamışdı, 1 milyon qaçqın-köçkün yaratmışdı. Ermənistana qarşı bir addım atardılar, pisləyərdilər, bundan sonra Azərbaycan haqqında danışardılar”.