Rusiyada Arktika üçün sualtı planerlərin yaradılmasından danışılır

“İzvestiya”: Rusiya Arktika üçün sualtı planerlər yaradıb.

Rusiya Arktikanın tədqiqi üçün sualtı planerlərin nümayiş bölmələri yaradıb. Bu barədə “İzvestiya”ya hidroloji proseslər laboratoriyasının qütb okeanologiyası qrupunun rəhbəri, Rusiya Elmlər Akademiyasının (RAN) Okeanologiya İnstitutunun aparıcı elmi işçisi, Rusiyanın fəxri qütb tədqiqatçısı Sergey Pisarev məlumat verib.

“Belə qurğular elektrik akkumulyatorları və elektronika ilə təchiz olunub ki, bunun sayəsində yük gövdə daxilində hərəkət edir və kənarda yerləşən qanadların meyl bucağı dəyişir. Bu manipulyasiyalar planerlərə müstəqil şəkildə böyük dərinliklərə enməyə, məlumat toplamağa, səthə çıxmağa və əldə edilən məlumatları peyklərə ötürməyə kömək edir”, - deyə mütəxəssis qeyd edib.

Onun sözlərinə görə, planerləri okeanın səthində yerləşdirilmiş təkrarlayıcılarla təchiz etmək olar. Pisarevin sözlərinə görə, müvafiq qurğular artıq dünyada, o cümlədən ikili istifadə sahələrində istifadə olunur.

Bundan əvvəl “Roskosmos” dövlət korporasiyası “Arktika-M” 2 nömrəli hidrometeoroloji peykinin ilk təsviri ötürdüyünü bildirib.