Putin nüvə silahı əmri verdi

Rusiya Prezidenti Vladimir Putin Təhlükəsizlik Şurasının üzvlərinə nüvə sınaqları üçün lazımi hazırlıqları görməyi tapşırdı.

Kremlin yaydığı açıqlamaya görə, Putin Təhlükəsizlik Şurasının üzvləri ilə görüş keçirib.

Görüşdə Rusiya müdafiə naziri Andrey Belousov, Baş Qərargah rəisi Valeri Gerasimov, Xarici Kəşfiyyat Xidmətinin (XKX) rəisi Sergey Narışkin, Təhlükəsizlik Şurasının katibi Sergey Şoyqu və Federal Təhlükəsizlik Xidmətinin (FSB) direktoru Aleksandr Bortnikov iştirak edib.

Görüşün əvvəlində ABŞ-ın nüvə sınaqlarına başlamaq planları müzakirə edilib.

Çıxışında Putin Rusiyanın Hərtərəfli Nüvə Sınaqlarının Qadağan Edilməsi Müqaviləsinə sadiq qaldığını və ondan çıxmaq planının olmadığını bildirib və deyib:

"2023-cü ildə Federal Məclisə etdiyim müraciətdə bildirmişdim ki, ABŞ və ya digər müqavilə tərəfləri nüvə sınaqları keçirərsə, Rusiya cavab verməyə məcbur olacaq. Bu baxımdan, Xarici İşlər Nazirliyinə, Müdafiə Nazirliyinə, kəşfiyyat xidmətlərinə və müvafiq mülki qurumlara məsələ ilə bağlı əlavə məlumat toplamağı, Təhlükəsizlik Şurası səviyyəsində təhlillər aparmağı və nüvə silahı sınaqlarına hazırlıqlara başlamaq üçün təkliflər təqdim etməyi tapşırıram".

"Nüvə sınaqlarına hazırlıqlara başlamağı məqsədəuyğun hesab edirəm"

Rusiyanın müdafiə naziri Andrey Belousov ABŞ-ın strateji silahlarını sürətlə modernləşdirdiyini və bu istiqamətdə yeni raket sistemlərinin hazırlanması üzərində işlədiyini bildirib.

Belousov həmçinin Vaşinqtonun "Qızıl günbəz" strateji raketdən müdafiə sisteminin yaradılması planını həyata keçirməyə başladığını bildirib. ABŞ-ın əvvəlki Ballistik Raket Əleyhinə Müqavilədən, Orta Mənzilli Nüvə Qüvvələri Müqaviləsindən (INF) və Açıq Səma Müqaviləsindən çıxmasını xatırladan Belousov deyib:

"Buna görə də ABŞ qlobal strateji sabitlik sistemini sarsıtmaq üçün nüvə sınaqlarına qoyulan qadağadan imtina edə bilər. ABŞ-ın nüvə sınaqları keçirmək planları Rusiya üçün hərbi təhlükə səviyyəsini əhəmiyyətli dərəcədə artırır. Ölkəmizin təhlükəsizliyini təmin etmək üçün hər vəziyyətdə düşmənə zərər verə biləcək nüvə potensialımızı dəstəkləməliyik. Buna görə də, tammiqyaslı nüvə sınaqlarına hazırlıqlara dərhal başlamağın məqsədəuyğun olduğunu düşünürəm".