16.02.2023 Bank

6 3

Kommersant.az xəbər verir ki, bankların açıqladığı maliyyə hesabatına görə, daşınmaz əmlak kreditlərini azaldan üç bankdan ikisi RETAİL, digəri isə korporativ bankdır.

İPOTEKA KREDİTİ AZALDANLAR

Daşınmaz əmlak krediti verən banklar arasında “AccessBank” ipoteka kreditini 1 milyon 569 min manat və ya 22.8% azaldaraq 5 milyon 317 min manata salıb. İpoteka krediti vermək üçün daşınmaz əmlaka baxış keçirilməli və qiymətləndirilməlidir. Bankın əməkdaşları baş ofisin qapısından çıxan kimi də "tıxacda ilişib qalırlar". Ona görə də mənzil başına gedib çata bilmirlər. Yəni, bu azalmada “AccessBank”ın yox, Bakının yol infrastrukturunu tənzimləyənlərdə günah var.

Hər azalan siyahıda olduğu kimi bu azalmada “Bank BTB” olmazsa, olmaz. "Bakılıların Ticarət Bankı" ipoteka kreditlərini 143 min manat azaldaraq 169 milyon 582 min manata enib. Azalmaya görə bu bankın günahı böyükdür. Bəs deməzlər ki, adını ticarət qoyub daşınmaz əmlak kreditini niyə azaltmısan? Daşınmaz əmlak ticarətinin gəlirindən yaxşı ticarət var? Buna görə də, sizə rənginiz kimi qırmızı kart göstəririk.

“Yelo Bank”ın ipoteka kreditləri 2021-ci ilin son rübü ilə müqayisədə 3 milyon 325 min manat və ya 4.4% azalaraq 72 milyon 498 min manata enib.

İpoteka kreditini verən bankların siyahısına baxırıq. Hamısının da baş ofisi tıxacların ana mərkəzlərində yerləşir. Sonra da düşünürük ki, bu bankların əməkdaşları bu tıxaca görəmi mənzil başına çata bilmirlər? Buna görə daşınmaz əmlak kreditləri azalıb? Sonra isə fərqinə vardıq ki, Bakıda artıq tıxacın "ana mərkəzi" yoxe, heç "ata mərkəzi" də yoxdur. Çünki, artıq tıxac üçün "pik saat" anlayışı da qalmayıb. Nə isə mövzumuzdan uzaqlaşmayaq. Yəqin ki, bu məsələ o banklarda işləyən əməkdaşlar üçün ağır mövzudur.

KORPORATİV BANKLAR

Korporativ banklar arasında ən çox ipoteka krediti verən “Azərbaycan Beynəlxalq Bankı” olub. O, 2022-ci ilin sonunda sözügedən kreditə 919 milyon 936 min manat ayırıb ki, bu da 2021-ci ilin analoji dövrü ilə müqayisədə 186 milyon 352 min manat və ya 25.4% çoxdur.

Türkiyənin ölkəmizdə fəaliyyət göstərən yeganə dövlət bankı “Ziraat Bank”ın daşınmaz əmlaka ayırdığı kredit 6 milyon 163 min manat olub. Bu rəqəm 2021-ci ilin son rübü ilə müqayisədə 3 milyon 955 min manat və ya 1.8 dəfə azdır. Bu bank da Qələbə dairəsində oturub, yuxarıdan aşağı Bakıya doğru baxıb deyir ki, “ay qardaş imkan ver işləyək. Mənə daşınmaz əmlak krediti lazımdır?”.

RETAİL BANKLAR

“Rabitə Bank”ın daşınmaz əmlaka ayırdığı vəsait 1 il ərzində 16 milyon 904 min manat və ya 20.4% artaraq 99 milyon 868 min manat yüksəlib. Bununla da neftçilərin bankı adını lider olaraq lövhəyə yaza bilib. Bu arada hörmətli “Rabitə Bank” demək olar ki, 1 aydır sizə sorğu göndərmişik. Xahiş edirik göndərdiyimiz suallara cavab verin. Sizi çox sevirik.

Ən az ipoteka krediti verən bank isə “Access Bank” olub.