Mərkəzi Bank 2025-ci ildə valyuta ehtiyatlarını $290 mln. artırıb

Azərbaycan Mərkəzi Bankının xarici valyuta ehtiyatlarının həcmi avqustda daha 58.2 milyon dollar və ya 0.52% artıb.

Kommersant.az xəbər verir ki, avqustun sonuna ehtiyatların həcmi 11 milyard 249 milyon dollar olub.

AMB-nin valyuta ehtiyatları 2024-cü ilin son rübündə 836.3 milyon dollar azalmışdı. Tənzimləyici bu azalmanı intervensiya kimi deyil, dövlət xərcləri ilə əlaqələndirmişdi. Lakin bundan sonra ehtiyatlar demək olar ki hər ay artan xətlə davam edib. Beləliklə 2025-ci ilin əvvəli ilə müqayisədə 289.9 milyon və ya 2.6% artıb.

Xatırladaq ki, Azərbaycan Mərkəzi Bankı 2025-ci ilin may ayından etibarən həftədə iki dəfə – çərşənbə axşamı və cümə axşamı keçirilən valyuta hərraclarının nəticələrini ictimaiyyətə açıqlamamağa qərar verib. AMB-nin sədri Taleh Kazımovun sözlərinə görə, əgər məzənnə dəyişmirsə və tələb ödənilirsə, bu məlumatlar bazarda baş verənləri təhlil etmək üçün kifayət etmir. Bu səbəbdən valyuta hərraclarının nəticələri yalnız ümumi ay və rüblük göstəricilər formasında açıqlanacaq.

Kazımov əlavə edib ki, son üç ildə AMB-nin valyuta bazarına etdiyi müdaxilələr ictimaiyyətə açıqlanıb və bu təcrübə davam etdiriləcək. Onun fikrincə, hərraclarda müxtəlif satış həcmilərinə media və ekspertlər tərəfindən birmənalı yanaşılmaması əsassız müzakirələrə səbəb olur:

“Hansısa hərracda 70 mln. dollar satış olanda qalmaqal edilir, 20 mln. dollar olanda isə heç bir reaksiya verilmir. Bu, ədalətsiz yanaşmadır.”

Baş bankir vurğulayıb ki, valyuta bazarında tələb və təklifin balansını müəyyən etmək üçün iki əsas göstərici var: sabit məzənnə və dəyişməyən ehtiyatlar. Bu iki göstərici tələb və təklif arasında tarazlığın mövcud olduğunu təsdiqləyir.