25.07.2025 Siyasət

0 0

ABŞ dövlət katibi Marko Rubio Fransanın Fələstin dövlətini tanımaq qərarını sərt şəkildə tənqid edib. Rubio X sosial media platformasında verdiyi açıqlamada, "Birləşmiş Ştatlar (Fransa Prezidenti) Emmanuel Makronun BMT Baş Assambleyasında Fələstin dövlətini tanımaq planını qəti şəkildə rədd edir" dedi.

Rubio qərarın "Həmasın təbliğatına xidmət etdiyini" iddia etdi və bu addımı "Oktyabrın 7-də həyatını itirənlərin üzünə bir sillə" olaraq xarakterizə etdi.

Fransa prezidenti Emmanuel Makron Fransanın Fələstin dövlətini tanımaq qərarına gəldiyini və bu qərarın sentyabrda BMT Baş Assambleyasında rəsmən elan ediləcəyini açıqlayıb. Makron X hesabında etdiyi paylaşımda “Yaxın Şərqdə ədalətli və davamlı sülhə dair tarixi öhdəliyinə sadiq qalaraq, Fransanın Fələstin dövlətini tanımasına qərar verdim” dedi.

Makronun Mahmud Abbasa məktubu

Makron həmçinin Fələstin prezidenti Mahmud Abbasa məktubunda əsas məqsədin Qəzzada qarşıdurmaya son qoymaq və mülki insanları qorumaq olduğunu vurğulayıb.

Fələstin məsələsinə iki dövlətli həll prizmasından yanaşması gözlənilən 28-30 iyul tarixlərində keçiriləcək “Beynəlxalq Fələstin Konfransı”na Fransanın Səudiyyə Ərəbistanı ilə həmsədrlik edəcəyi də açıqlanıb.