Rabitəbankda risklər artır: Kredit ehtiyatları böyüyür, öhdəliklər isə kəskin yüksəlib

“Rabitəbank”ın 2025-ci il üzrə 9 aylıq hesabatı likvidlik və risk idarəçiliyi ilə bağlı ciddi suallar yaradıb. Bankın gələcəkdə dayanıqlılıq problemləri ola bilər.

Kommersant.az xəbər verir ki, “Rabitəbank”ın 2025-ci ilin 30 sentyabr tarixinə olan maliyyə göstəriciləri bankın strukturunda risklərin artdığını üzə çıxarıb. Bankın aktivləri ötən ilin sonuna nisbətən 13% artaraq 1 milyard 307 milyon manata çatsa da, bu artım əsasən kredit portfelinin genişlənməsi hesabına baş verib. Aktivlərdəki artımın əsasən kreditləşmə hesabına formalaşması isə Rabitəbankın maliyyə sabitliyinə əlavə təzyiqlər yaradır.

Müştərilərə verilmiş kreditlərin həcmi 9 ay ərzində 848 milyon manatdan 953 milyon manata yüksəlib. Xüsusilə istehlak və daşınmaz əmlak kreditlərində ciddi artım müşahidə olunur. Lakin kredit portfelinin genişlənməsi ilə yanaşı, mümkün zərərlər üçün yaradılan məqsədli ehtiyatlar da əhəmiyyətli dərəcədə artaraq 23,5 milyon manatdan 31 milyon manata qədər yüksəlib. Bu, bankın problemli kreditlərlə bağlı risklərinin böyüdüyünə işarə edir ki, buna görə də addımlar atılır.

Digər mühüm göstərici isə bankın öhdəliklərindəki artımdır. 2024-cü ilin sonunda 1 milyard 31 milyon manat olan ümumi öhdəliklər 2025-ci ilin sentyabr ayına 1 milyard 175 milyon manata çatıb.

Likvid vəsaitlər üzrə göstəricilərdə ciddi irəliləyiş müşahidə olunmasa da, balans strukturundakı dəyişikliklər bankın risk idarəçiliyi və likvidlik vəziyyəti ilə bağlı suallar doğurur. Bu kimi struktur dəyişiklikləri uzunmüddətli dövrdə bankın dayanıqlılığı üçün potensial problemlər yarada bilər.

Rabitəbank	2025 (III Rüb)	2024 (IV Rüb)	Fərq
Cəmi Aktivlər	1.307,337	1.154,465	152,872
Bloklaşdırılmış nağd vəsait	119,683	99,858	19,825
Kredit	953,150	848,092	105,058
İstehlak kreditləri	341,804	293,398	48,406
Biznes kreditləri	431,216	399,112	32,104
Daşınmaz əmlak kreditləri	180,131	155,582	24,549
Mümkün zərərlər üçün yaradılan məqsədli ehtiyat	31,055	23,520	7,535
Xalis Kreditlər	922,095	824,572	97,523
Cəmi Öhdəliklər	1.174,937	1.031,499	143,438
Depozit	792,913	677,219	115,694
Fiziki şəxslərin depozitləri	550,855	461,954	88,901
Hüquqi şəxslərin depozitləri	242,058	215,264	26,794
Cəmi Kapital	132,400	122,965	9,435
Səhmdar kapitalı	101,300	101,300	-
Səhmin qiymətinin dəyişməsindən gəlir (zərər)	0	0	0
Bölüşdürülməmiş mənfəət	17,820	9,071	8,749
Ümumi ehtiyatlar	13,280	12,594	686