08.05.2023 İqtisadiyyat

18 5

Kommersant.az xəbər verir ki, ötən həftəni 75,75 dollara kimi bahalaşan Brent markalı neftin barel qiyməti günü 75,30 dollarla tamamlayıb. Bu günə olan məlumata görə, Brent markalı neftin bir barelinin qiyməti bağlanış tarixi ilə müqayisədə 0,7 faiz artaraq 75,83 dollar olub. Eyni zamanda, West Texas Intermediate (WTI) xam neftinin bir bareli 71,91 dollardan alıcı tapıb.

Qiymətlərin qalxmasına səbəb ABŞ-da cümə günü açıqlanan əmək bazarı məlumatlarının tənəzzüllə bağlı narahatlıqları azaltması olub.

Cümə günü açıqlanan məlumatlara görə, ABŞ-da kənd təsərrüfatı xaricində məşğulluq aprel ayında gözləntiləri aşaraq 253 min nəfər artıb, işsizlik nisbəti isə 3,5 faizdən 3,4 faizə düşüb. Məlumatlar ölkədəki tənəzzül narahatlığını aradan qaldırsa da, ABŞ Federal Ehtiyat Sisteminin (FED) siyasət faizini bir müddət bu səviyyədə saxlayacağına dair gözləntilər güclü olaraq qaldı.

Qeyd edək ki, ABŞ-ın bank böhranının iqtisadiyyatı yavaşladacağı və dünyanın ən böyük neft istehlakçısının yanacağa tələbatını azaldacağı ilə bağlı narahatlıqlar keçən həftə Brent markalı neftin təxminən 5 faiz, WTI markalı xam neftin isə 7 faiz azalmasına səbəb olub.

ABŞ-dan gələn güclü məlumatlar, zəif dollar və əsas neft istehsalçılarının növbəti görüşlərində təklifi azalda biləcəkləri ilə bağlı proqnozlar qiymətləri dəstəkləməyə davam edir.