Ramiz Mehdiyev nə etmək istəyir? - “Hələ sağ-salamatıq, heç kim dağılışmasın”
Bu sözləri Pravda.az-a açıqlamasında Ağ Partiyanın sədri Tural Abbaslı deyib.
Partiya sədri bildirib ki, hansısa dövlət qurumunun tərkibində yeni orqan yaratmaq dövlət büdcəsinə də əlavə xərcdir: "Bildiyimiz kimi, Tarix İnstitutu özü lazım olan vaxt ictimai-siyasi tarixi araşdırır, yəni artıq bu işlə məşğul olan bir qurum var. Mən bilmirəm ki, bu yeni şöbə elmə nə verəcək? Belə çıxır ki, Dövlət Gömrük Komitəsi, Dövlət Vergi Xidməti və Dövlət Sərhəd Xidməti tarixi şöbəsi də yaradılmalıdır? Bu, əslində Ramiz Mehdiyevin dövlət strukturlarına paralel şəkildə özü üçün yeni strukturlar yaratmasıdır. Ramiz Mehdiyev əslində Azərbaycan Milli Elmlər Akademiyasının tərkibində balaca dövlət yaradır və mən həmişə də bəyan edirəm ki, Azərbaycandakı "Beşinci kolon"un rəhbəri odur. Qısaca belə deyə bilərəm, Ramiz Mehdiyev dövlət içində dövlətə qarşı öz dövlətini qurur. Kimisə niyyətlərinə görə həbs etmək mümkün olmadığı üçün, Ramiz Mehdiyevin hələ niyyətlərini qoyuram bir kənara, lakin hələ təkcə bu günə qədər etdiyi qanunsuzluqlar, törətdiyi rüşvət və korrupsiya hallarına görə barəsində cinayət işi açılmalı, o, məsuliyyətə cəlb edilməli və mütləq həbs olunmalıdır. Onun azadlıqda qalmasının hər günü, AMEA kimi strateji əhəmiyyətli bir quruluşun rəhbəri olmasının hər saatı dövlətçilik üçün təhlükəlidir".
T.Abbaslı əlavə edib ki, onlarla heç bir əməkdaşlıqdan söhbət gedə bilməz: “Əgər sabah-birigün qeyri-adi bir hadisə baş versə və məlum olsa ki, sözügedən şöbə doğrudan da tarixlə məşğuldur, heç onda da əməkdaşlığa lüzum yoxdur. Şükür Allaha, müasir aləmdi, texnologiya inkişaf edib, yəni partiyanın tarixi ilə bağlı istənilən məlumatı əldə edə bilərlər. Amma təkrar edirəm, niyyət tarix deyil, niyyət başqadır”.
Qeyd: Azərbaycan Milli Elmlər Akademiyasında (AMEA) siyasi partiyalarla bağlı yeni şöbə yaradılır. Siyasi partiyalar və ictimai təşkilatların tarixi şöbəsi Tarix İnstitutunda fəaliyyətə başlayacaq. Artıq yeni şöbənin yaradılması və fəaliyyət istiqaməti İnstitutun Elmi Şurasının iclasının gündəliyinə salınıb və iclasda müzakirələrdən sonra təsdiqlənib.
Digər xəbərlər
